350 ഗ്രാം എംഡിഎംഎ പിടികൂടി; അറസ്റ്റിലായത് യുവതിയുൾപ്പെടെയുള്ള സംഘം

കൊച്ചി: കലൂർ സ്റ്റേഡിയം പരിസരത്ത് നിന്ന് 350 ഗ്രാം എംഡിഎംഎ പിടികൂടി. യുവതിയുൾപ്പെടെ നാലുപേരെ പോലീസ് അറസ്ററ് ചെയ്തു. സ്റ്റേഡിയം പരിസരത്ത് കാറില്‍ ഏജന്റുമാരെ കാത്തിരിക്കുമ്പോഴാണ് സംഘത്തെ പിടികൂടിയത്.

കോട്ടയം ചിങ്ങവനം മുട്ടത്താട്ടുചിറയില്‍ സൂസിമോള്‍ (24), അങ്കമാലി മങ്ങാട്ടുകര മാളിയേക്കല്‍ എല്‍റോയ് (21), കാക്കനാട് അത്താണി കുറുമ്പനാട്ടുപറമ്പില്‍ അജ്മല്‍ (25), ചെങ്ങമനാട് കല്ലൂക്കാടന്‍പറമ്പില്‍ അമീര്‍ (22) എന്നിവരാണ് അറസ്റ്റിലായത്.

ഹിമാചല്‍പ്രദേശില്‍നിന്നുള്ള സംഘം എം.ഡി.എം.എ. നെടുമ്പാശ്ശേരി വിമാനത്താവള പരിസരത്ത് എത്തിക്കും. പിടിയിലായവര്‍ ഇത് അവിടെനിന്നും കലൂര്‍, പാലാരിവട്ടം, സ്റ്റേഡിയം പരിസരം തുടങ്ങി വിവിധയിടങ്ങളിലെ ഏജന്റുമാര്‍ക്ക് കൈമാറും. ദീര്‍ഘകാലമായി ഇതു തുടരുകയായിരുന്നുവെന്നും എക്‌സൈസ് അധികൃതര്‍ പറഞ്ഞു.

ഒരു ഗ്രാം എം.ഡി.എം.എ.യ്ക്ക് ഗ്രാമിന് 3,000 രൂപ മുതലാണ് വില. കച്ചേരിപ്പടിയിലെ എക്‌സൈസ് ഓഫീസിലെത്തിച്ച ഇവരെ ചോദ്യംചെയ്തുവരുകയാണ്.