‘ആടുജീവിതം’ ഗള്‍ഫ് റിലീസ് മാറ്റിവച്ചു; പൃഥ്വിരാജ് ചിത്രം മാര്‍ച്ച് 28ന് എത്തില്ല; യുഎഇയില്‍ മാത്രം റിലീസ് ദിനം പ്രദര്‍ശനം നടക്കും

നീണ്ട കാത്തിരിപ്പുകള്‍ക്കൊടുവില്‍ പൃഥ്വിരാജ്-ബ്ലെസി ചിത്രം ആടുജീവിതം മാര്‍ച്ച് 28ന് തിയറ്ററുകളില്‍ എത്തുകയാണ്. അന്നേദിവസം ആഗോളതലത്തില്‍ ചിത്രം റിലീസ് ചെയ്യും എന്നായിരുന്നു നേരത്തേ പറഞ്ഞിരുന്നത്. എന്നാല്‍ ജിസിസി രാജ്യങ്ങളിൽ മാര്‍ച്ച് 28ന് ചിത്രം എത്തില്ലെന്നാണ് പുതിയ റിപ്പോര്‍ട്ട്.

ഗള്‍ഫ് രാജ്യങ്ങളില്‍ ചിത്രത്തിന്റെ റിലീസ് ക്യാന്‍സല്‍ ചെയ്തിരിക്കുകയാണ്. യുഎഇയിലെ കേന്ദ്രങ്ങളില്‍ മാത്രമേ റിലീസ് തിയതിയില്‍ ചിത്രം പ്രദര്‍ശനത്തിനെത്തൂ. സെന്‍സര്‍ഷിപ്പ് പൂര്‍ത്തിയാക്കാത്തതിനാലാണ് മറ്റിടങ്ങളിലെ റിലീസ് മാറ്റിവച്ചത് എന്നാണ് അറിയുന്നത്. ബഹറൈന്‍, കുവൈറ്റ്, ഒമാന്‍, ഖത്തര്‍, സൗദി അറേബ്യ തുടങ്ങിയ രാജ്യങ്ങളില്‍ സെന്‍സറിങ് പൂര്‍ത്തിയാക്കി ചിത്രം ഏപ്രില്‍ ആദ്യവാരം എത്തും എന്നാണ് പ്രതീക്ഷിക്കുന്നത്.

പൃഥ്വിരാജിന്റെ സിനിമാ ജീവിതത്തിലെ ഏറ്റവും വലിയ റിലീസിനാണ് ആടുജീവിതം തയ്യാറെടുക്കുന്നത്. മാര്‍ച്ച് 28ന് 550 സ്‌ക്രീനുകളിലാണ് ചിത്രം പ്രദര്‍ശനത്തിനൊരുങ്ങുന്നത് എന്നാണ് റിപ്പോര്‍ട്ടുകള്‍. ചിത്രത്തിന് പോസിറ്റീവ് പ്രതികരണങ്ങളാണ് ലഭിക്കുന്നതെങ്കില്‍ കേരളത്തില്‍ വീണ്ടും 100 പ്രദര്‍ശനങ്ങള്‍ കൂടുതല്‍ ലഭിക്കും.