‘ആടുജീവിതം’ നേരത്തെയെത്തും; പൃഥ്വിരാജ് ചിത്രം മാർച്ചിൽ, പുതിയ റിലീസ് തിയതിയുമായി അണിയറപ്രവർത്തകർ

മലയാളികള്‍ ഒന്നടങ്കം ഉറ്റുനോക്കിക്കൊണ്ടിരുന്ന ബ്ലെസിയുടെ ആടുജീവിതം സിനിമയുടെ റിലീസ് തീയതി മാറ്റി. ചിത്രം നേരത്തെയെത്തും എന്നതാണ് പുതിയ വിവരം. 2024 ഏപ്രില്‍ 10ന് റിലീസ് ചെയ്യാനിരുന്ന ചിത്രം മാര്‍ച്ച് 28ലേക്ക് മാറ്റി. ബെന്യാമിന്റെ ‘ആടുജീവിതം’ എന്ന നോവലിനെ ആസ്പദമാക്കി ഒരുങ്ങുന്ന ചിത്രം, മരുഭൂമിയിലെ ഒരു ആടുവളര്‍ത്തല്‍ കേന്ദ്രത്തിലെ ദുരിതപൂര്‍ണമായ സാഹചര്യങ്ങളില്‍ മൂന്നിലേറെ വര്‍ഷം അടിമപ്പണി ചെയ്യേണ്ടി വന്ന നജീബ് എന്ന മലയാളി യുവാവിന്റെ കഥയാണ് പറയുന്നത്.

പൃഥ്വിരാജ് സുകുമാരന്‍ നായകനാകുന്ന ഈ സിനിമ ബ്ലെസിയുടെ 15വര്‍ഷത്തെ ഡ്രീം പ്രൊജക്ടാണ്. ബ്ലെസിയുടെ സ്വന്തം നിര്‍മ്മാണ കമ്പനിയായ വിഷ്വല്‍ റൊമാന്‍സാണ് ചിത്രം നിര്‍മ്മിക്കുന്നത്. തിരക്കഥ-സംഭാഷണം-സംവിധാനവും അദ്ദേഹം തന്നെയാണ് നിര്‍വഹിക്കുന്നത്. 2008-ലാണ് സിനിമയ്ക്കായുള്ള തയാറെടുപ്പുകള്‍ ആരംഭിക്കുന്നത്. 2018-ല്‍ ചിത്രീകരണം ആരംഭിച്ചു. കേരളത്തിലും അല്‍ജീരിയയിലും ജോര്‍ദാനിലും അടക്കം നാല് വര്‍ഷമാണ് ചിത്രീകരണം നീണ്ടത്. കോവിഡിന്റെ സമയത്ത് സംഘം ജോര്‍ദാനില്‍ കുടുങ്ങിയത് വാര്‍ത്തയായിരുന്നു.

സിനിമയ്ക്കായി പൃഥ്വിരാജ് തന്റെ ഭാരം 31 കിലോ കുറച്ചത് സോഷ്യല്‍ മീഡിയയില്‍ ചര്‍ച്ചാവിഷയമായിരുന്നു. സിനിമാരംഗത്തെ മികച്ച പ്രതിഭകളാണ് അണിയറയില്‍ പ്രവര്‍ത്തിച്ചത്. എ.ആര്‍. റഹ്‌മാന്‍ സംഗീത സംവിധാനവും റസൂല്‍ പൂക്കുട്ടി സൗണ്ട് ഡിസൈനും നിര്‍വഹിക്കുന്ന ചിത്രം കൂടിയാണിത്. കെ.എസ്. സുനില്‍ ഛായാഗ്രാഹണം. കലാസംവിധാനം പ്രശാന്ത് മാധവ്. രഞ്ജിത്ത് അമ്പാടിയാണ് മേക്കപ്പ് ആര്‍ട്ടിസ്റ്റ്. വസ്ത്രാലങ്കാരം സ്റ്റെഫി സേവ്യര്‍. ചിത്രത്തില്‍ അമല പോളും ശോഭ മോഹനും ഒപ്പം വിദേശ കലാകാരന്മാരും അഭിനയിക്കുന്നുണ്ട്.