ദിവ്യയുടെ ജാമ്യാപേക്ഷയിൽ ഇന്ന് വിധി; ജാമ്യം നിരസിച്ചാല്‍ ഹൈക്കോടതി ആശ്രയം

കണ്ണൂർ എഡിഎം കെ.നവീൻ ബാബുവിന്റെ മരണത്തില്‍ പ്രതിയായി റിമാൻഡിൽ കഴിയുന്ന കണ്ണൂർ ജില്ലാ പഞ്ചായത്ത് മുൻ പ്രസിഡന്റ് പി.പി.ദിവ്യയുടെ ജാമ്യാപേക്ഷയിൽ ജില്ലാ സെഷൻസ് ജഡ്ജി കെ.ടി.നിസാർ അഹമ്മദ് ഇന്ന് വിധി പറയും. ഒക്ടോബർ 29ന് അറസ്റ്റിലായ ശേഷം കണ്ണൂർ വനിതാ ജയിലിൽ റിമാൻഡിലാണ്. ഇന്നും ജാമ്യാപേക്ഷ തള്ളുകയാണെങ്കിൽ ദിവ്യയ്ക്ക് ഹൈക്കോടതിയെ സമീപിക്കേണ്ടിവരും

ദിവ്യയുടെ ജാമ്യാപേക്ഷയിൽ കഴിഞ്ഞ ദിവസം വാദം പൂര്‍ത്തിയായിരുന്നു. പ്രോസിക്യൂഷനും പ്രതിഭാഗവും നവീൻ ബാബുവിന്റെ ഭാര്യ മഞ്ജുഷയുടെ അഭിഭാഷകനും രണ്ടുമണിക്കൂർ നീണ്ട വാദം നടത്തിയിരുന്നു. എഡിഎം കുറ്റസമ്മതം നടത്തി എന്ന കളക്ടറുടെ മൊഴിയില്‍ ഊന്നിയായിരുന്നു പ്രതിഭാഗത്തിന്റെ വാദം. എന്നാല്‍ ദിവ്യക്ക് എതിരെ ആത്മഹത്യാ പ്രേരണകുറ്റം നിലനില്‍ക്കുന്നു എന്നും ജാമ്യം നല്‍കരുതെന്നും പ്രോസിക്യൂഷന്‍ വാദിച്ചു.

Also Read: സിപിഎം ആയാൽ മതി, ഏതറ്റംവരെയും സംരക്ഷണം!! തെളിവുകൾ അനവധി; ഒടുവിലെ ഉദാഹരണമായി പിപി ദിവ്യ

ഇന്ന് ജാമ്യം ലഭില്ലെങ്കിൽ വീണ്ടും ജില്ലാ സെഷൻസ് കോടതിയിൽ ജാമ്യാപേക്ഷ നൽകാം. അല്ലെങ്കില്‍ ഹൈക്കോടതി തന്നെ ആശ്രയം. കേസിലെ തെളിവ് ശേഖരണം പൂർത്തിയാകുക, പ്രധാന സാക്ഷികളുടെ മൊഴി രേഖപ്പെടുത്തുക തുടങ്ങിയവ കഴിഞ്ഞാൽ ഈ കോടതിയിൽനിന്നുതന്നെ ജാമ്യം ലഭിച്ചേക്കും.

Also Read: ഒടുവില്‍ ദിവ്യക്കെതിരെ പാർട്ടി നടപടി; പദവികളിൽനിന്ന് നീക്കി; ബ്രാഞ്ചിലേക്ക് തരംതാഴ്ത്തി

അതേസമയം ദിവ്യയ്ക്കെതിരേ പാർട്ടി നടപടി എടുത്തിട്ടുണ്ട്. ദിവ്യയെ പദവികളിൽനിന്ന് നീക്കുകയും ബ്രാഞ്ചിലേക്ക് തരംതാഴ്ത്തുകയുമാണ് ചെയ്തിരിക്കുന്നത്.