അഖില്‍ കൊലക്കേസില്‍ ഒരാള്‍ കസ്റ്റഡിയില്‍; കൂട്ടുപ്രതികളായ മൂന്ന് പേരെ തിരയുന്നു; പ്രതികള്‍ അനന്തു വധത്തിലും ഉള്‍പ്പെട്ടവരെന്ന് പോലീസ്

തിരുവനന്തപുരം: കരമനയില്‍ യുവാവിനെ ക്രൂരമായി കൊലപ്പെടുത്തിയ കേസില്‍ പ്രതികളിലൊരാള്‍ പോലീസ് കസ്റ്റഡിയില്‍. കിരണ്‍ കൃഷ്ണയെയാണ് കസ്റ്റഡിയിലെടുത്തത്. കേസില്‍ നാല് പ്രതികളുണ്ടെന്നാണ് പോലീസ് പറയുന്നത്. ഇതില്‍ കിരണ്‍ കൃഷ്ണ ഉള്‍പ്പെടെ മൂന്നുപേരാണ് കൊലപാതകത്തില്‍ നേരിട്ട് പങ്കെടുത്തത്. വിനീത്, അനീഷ്, അപ്പു എന്നിവരാണ് മറ്റു പ്രതികള്‍. ഇവര്‍ക്കായി തിരച്ചില്‍ തുടരുകയാണ്.

കരമന മരുതൂര്‍ക്കടവ് സ്വദേശി അഖിലിനെ(26)യാണ് കാറിലെത്തിയ സംഘം അതിക്രൂരമായി കൊലപ്പെടുത്തിയത്. ഇന്നലെ വൈകീട്ട് അഞ്ചുമണിയോടെ കരമന മരുതൂര്‍ കടവിലായിരുന്നു കൊലപാതകം. അഖിലിനെ കമ്പിവടികൊണ്ട് അടിച്ചുവീഴ്ത്തിയ പ്രതികള്‍ സിമന്റ് കട്ട കൊണ്ട് തലയ്ക്കടിച്ച് കൊലപ്പെടുത്തുകയായിരുന്നു.

ഏപ്രില്‍ 25-ന് പ്രതികളും അഖിലും തമ്മില്‍ ബാറില്‍വെച്ച് തര്‍ക്കമുണ്ടായിരുന്നു. ഇതിന്റെ വൈരാഗ്യമാണ് അരുംകൊലയില്‍ കലാശിച്ചത്. അഖില്‍ കൊലക്കേസിലെ പ്രതികളെല്ലാം 2019 ലെ അനന്തു കൊലക്കേസിലും ഉള്‍പ്പെട്ടവരാണെന്ന് പോലീസ് സ്ഥിരീകരിച്ചിട്ടുണ്ട്. വിചാരണ നടക്കുന്ന അനന്തു കൊലക്കേസില്‍ ജാമ്യത്തില്‍ കഴിയവേയാണ് ഇവര്‍ വീണ്ടും കൊലപാതകം നടത്തിയത്.