ഓൾ ഇംഗ്ലണ്ട് ഓപ്പൺ ബാഡ്മിന്റൺ ചാമ്പ്യൻഷിപ്പ് ഫൈനൽ ലക്ഷ്യമിട്ട് ഇന്ത്യയുടെ ലക്ഷ്യ സെൻ; സെമിയിൽ എതിരാളി ഇന്തോനേഷ്യൻ താരം

ബർമിങ്ഹാം: ഓൾ ഇംഗ്ലണ്ട് ഓപ്പൺ ബാഡ്മിന്റൺ ചാമ്പ്യൻഷിപ്പ് പുരുഷ സിംഗിൾസ് സെമി പോരാട്ടത്തിൽ ഇന്ത്യൻ താരം ലക്ഷ്യ സെൻ ഇന്ന് ഇന്തോനേഷ്യയുടെ ജോനാതൻ ക്രിസ്റ്റിയെ നേരിടും. ഇന്നലെ നടന്ന ക്വാർട്ടർ ഫൈനൽ മത്സരത്തിൽ മലേഷ്യയുടെ ലീ സീ ജിയയെ പരാജയപ്പെടുത്തിയാണ് ലക്ഷ്യ സെൻ സെമിയിൽ പ്രവേശിച്ചത്.

2021ലെ ചാമ്പ്യനായ ലീക്കെതിരെ തകർപ്പൻ പ്രകടനമാണ് ലക്ഷ്യ സെൻ കാഴ്ചവച്ചത്. 20-22, 21-16, 21-19 എന്നിങ്ങനെയാണ് സ്കോർ. 2022ലെ ഓൾ ഇംഗ്ലണ്ട് ഓപ്പൺ ചാമ്പ്യൻഷിപ്പിൽ റണ്ണേഴ്‌സ് അപ്പ് ആയിരുന്നു ലക്ഷ്യ സെൻ. ഒരു മണിക്കൂർ പത്തു മിനിറ്റിൽ കളി അവസാനിപ്പിക്കാൻ ഇന്ത്യൻ താരത്തിന് കഴിഞ്ഞു. 2024 പാരീസ് ഒളിമ്പിക്സിൽ യോഗ്യത നേടാൻ ഈ മത്സരങ്ങളിൽ നിന്ന് ലഭിക്കുന്ന പോയിന്റ് നിർണായകമാണ്. 2023 മെയ് ഒന്നുമുതൽ 2024 ഏപ്രിൽ അവസാനം വരെയുള്ള മത്സരങ്ങളിലെ പോയിന്റുകളുടെ അടിസ്ഥാനത്തിലാണ് ഒളിമ്പിക്സ് യോഗ്യത നിശ്ചയിക്കുന്നത്.