അഭയക്കേസ് പ്രതി ഫാ.പൂതൃക്കയെ വെറുതെവിട്ട സുപ്രീം കോടതി മുൻ ജഡ്ജി കോട്ടയം രൂപതയുടെ പരിപാടിയിൽ!! നിയമവൃത്തങ്ങളിൽ ആശ്ചര്യം

ഫാ തോമസ് കോട്ടൂർ, ഫാ ജോസ് പൂതൃക്കയിൽ, സിസ്റ്റർ സെഫി എന്നിങ്ങനെ സിബിഐ അന്വേഷണ സംഘം പ്രതിചേർത്ത മൂന്നുപേരിൽ ഫാ പൂതൃക്കയിലിനെ 2018ലാണ് തിരുവനന്തപുരം സിബിഐ കോടതി ഒഴിവാക്കിയത്. ഇതിന്മേൽ അഭയ ആക്ഷൻ കൗൺസിൽ കൺവീനർ ജോമോൻ പുത്തൻപുരയ്ക്കൽ നൽകിയ ഹർജിയും അതിൻ്റെ അപ്പീലും 2019ൽ ഹൈക്കോടതി തള്ളി. ഇതിനെ തുടർന്ന് സുപ്രീം കോടതിയിൽ നൽകിയ സ്പെഷ്യൽ ലീവ് പെറ്റീഷൻ തള്ളിയ ജഡ്ജിയാണ് എസ്.അബ്ദുൽ നസീർ.

ഇതേ അബ്ദുൽ നസീർ ആണ് അഞ്ചു വർഷത്തിനുള്ളിൽ അന്ന് പ്രതികളെ സംരക്ഷിക്കാൻ ശ്രമിച്ചുവെന്ന് ആരോപണമുള്ള, അവരുൾപ്പെട്ട കോട്ടയം രൂപതയുടെ പരിപാടിയിൽ വിശിഷ്ടാതിഥി ആയി പങ്കെടുത്തത്. സുപ്രീം കോടതിയിൽ നിന്ന് വിരമിച്ച അദ്ദേഹം ഇന്നിപ്പോൾ ആന്ധ്ര പ്രദേശ് ഗവർണർ ആണെന്ന വ്യത്യാസം മാത്രം. അയോധ്യാ കേസിൽ വിധി പറഞ്ഞ അഞ്ചംഗ ബെഞ്ചിൽ ഉൾപെട്ട അബ്ദുൽ നസീർ 2023 ജനുവരിയിൽ വിരമിക്കുകയും ഫെബ്രുവരിയിൽ തന്നെ ഗവർണർ സ്ഥാനം അദ്ദേഹത്തെ തേടിയെത്തുകയും ആയിരുന്നു.

തുടക്കം മുതൽ സിസ്റ്റർ അഭയ കേസിൽ ഇടപെടാൻ ശ്രമിച്ചുവെന്ന് ജോമോൻ പുത്തപുരയ്ക്കലിൻ്റെ പരാതിയിൽ ആരോപണ വിധേയനായ ജസ്റ്റിസ് സിറിയക് ജോസഫ് ആയിരുന്നു ഇന്നലത്തെ പരിപാടിയുടെ സംഘാടകൻ. അഭയ കൊല്ലപ്പെടുമ്പോൾ അവരുൾപ്പെട്ട കോട്ടയം രൂപതയുടെ മെത്രാനെന്ന നിലയിൽ കേസ് അട്ടിമറിക്കാൻ ശ്രമിച്ചുവെന്ന് ആരോപണ വിധേയനായ മാർ കുര്യാക്കോസ് കുന്നശ്ശേരിയുടെ പേരിൽ ഏർപ്പെടുത്തിയ അവാർഡ് ഡോ.മാത്യു പാറയ്ക്കലിന് നൽകുന്നത് ആയിരുന്നു ചടങ്ങ്. ഇതേ ചടങ്ങിൽ വിശിഷ്ടാതിഥി ആയി പങ്കെടുക്കാൻ എത്തിയതോടെ രണ്ടു മുൻ ജഡ്ജിമാരും തമ്മിലുള്ള അന്തർധാര വ്യക്തമായെന്ന് ജോമോൻ പുത്തൻപുരയ്ക്കൽ മാധ്യമ സിൻഡിക്കറ്റിനോട് പറഞ്ഞു.

അഭയ കേസിൽ ഇരട്ടജീവപര്യന്തം തടവിന് കോടതി ശിക്ഷിച്ച ഫാ തോമസ് കോട്ടൂരിൻ്റെ സ്വന്തം സഹോദരൻ, സിറിയക് ജോസഫിൻ്റെ ഭാര്യയുടെ സഹോദരിയെ ആണ് വിവാഹം ചെയ്തിരിക്കുന്നത് എന്ന് ജോമോൻ പുത്തൻപുരയ്ക്കൽ പറഞ്ഞു. സിറിയക് ജോസഫും അബ്ദുൽ നസീറും തമ്മിൽ ദീർഘകാലത്തെ ബന്ധമുണ്ട്. സിറിയക് കർണാടക ഹൈക്കോടതി ചീഫ് ജസ്റ്റിസ് ആയിരിക്കെ അദ്ദേഹത്തിനൊപ്പം ജഡ്ജി ആയിരുന്നു നസീർ. ഈ ബന്ധത്തിൻ്റെ ബലത്തിലാണ് തൻ്റെ അപേക്ഷ വാദം പോലും കേൾക്കാതെ തള്ളി ജസ്റ്റിസ് അബ്ദുൽ നസീർ ഫാ പൂതൃക്കയിലിനെ വിട്ടയച്ചത് എന്നും ജോമോൻ ആരോപിക്കുന്നു.

ഹൈക്കോടതിയുടെ രണ്ടു ബെഞ്ചുകൾ സ്വീകരിച്ച നിലപാടുകളിലെ വൈരുദ്ധ്യം പോലും പരിശോധിക്കാൻ സുപ്രീം കോടതിയിൽ അന്ന് ജസ്റ്റിസ് അബ്ദുൽ നസീർ തയ്യാറായില്ല. ഫാ പൂതൃക്കയിലിനെ വിട്ടയച്ചു കൊണ്ടുള്ള തിരുവനന്തപുരം സിബിഐ കോടതി വിധിക്ക് പിന്നാലെ തന്നെ അപ്പീലുമായി താൻ ഹൈക്കോടതിയിൽ എത്തി. എന്നാൽ സിബിഐ ആണ് അപ്പീൽ ഫയൽ ചെയ്യേണ്ടത് എന്ന കാരണം കാണിച്ച് ജസ്റ്റിസ് സുനിൽ തോമസ് അത് തള്ളി. എന്നാൽ പിന്നീട് സിബിഐ തന്നെ അപ്പീൽ ഫയൽ ചെയ്തപ്പോൾ പരിഗണിച്ച ജസ്റ്റിസ് അലക്സാണ്ടർ തോമസാകട്ടെ, ജോമോൻ പുത്തൻപുരയ്ക്കലിൻ്റെ ഹർജി തള്ളിയതിനാൽ സിബിഐയുടെ ഹർജിയും തള്ളുന്നു എന്നാണ് നിലപാട് എടുത്തത്; ജോമോൻ പുത്തൻപുരയ്ക്കൽ വിശദീകരിച്ചു.

തൻ്റെ മുന്നിൽ ഒരിക്കൽ പരിഗണനക്ക് വന്ന കേസുമായി പരോക്ഷമായി പോലും ബന്ധമുള്ള ഒന്നിലും ഇടപെടാതിരിക്കുകയാണ് വിരമിച്ച ശേഷവും ചെയ്യേണ്ടതെന്ന് കേരള ഹൈക്കോടതി മുൻ ജഡ്ജി കെമാൽ പാഷ മാധ്യമ സിൻഡിക്കറ്റിനോട് പ്രതികരിച്ചു. ജുഡീഷ്യറിയുടെ അന്തസ് കാത്തുസൂക്ഷിക്കാൻ അത് അത്യാവശ്യമാണ്. താനാണെങ്കിൽ ഇത്തരമൊരു പരിപാടിയുടെ സംഘാടകരെ കാണാൻ പോലും തയ്യാറാകില്ലായിരുന്നു. അവരുടെ ക്ഷണം സ്വീകരിച്ച ജസ്റ്റിസ് അബ്ദുൽ നസീറിൻ്റെ പ്രവൃത്തി തീർത്തും അനുചിതമായെന്നും കെമാൽ പാഷ ചൂണ്ടിക്കാട്ടി.