മകളുടെ ആനുകൂല്യങ്ങള്‍ നല്‍കിയത് മാധ്യമ വാര്‍ത്തകള്‍ക്ക് ശേഷം; അധിക ജോലിക്ക് അവധി പോലുമില്ല; ഇവൈ കമ്പനിയുടെ ക്രൂരതകള്‍ വിവരിച്ച് അന്നയുടെ മാതാവ്

അമിത ജോലിഭാരം മൂലം ജീവന്‍ നഷ്ടപെട്ട അന്ന സെബാസ്റ്റ്യന്‍ പേരയിലിന്റെ ആനുകൂല്യങ്ങള്‍ അനുവദിക്കുന്നതില്‍ പോലും ഏണസ്റ്റ് ആന്റ് യംഗ് (EY) കമ്പനി ക്രൂരത കാട്ടിയെന്ന് അമ്മ അനിത അഗസ്റ്റിന്‍. മകള്‍ അനുഭവിച്ച തൊഴില്‍ പീഡനങ്ങളെ കുറിച്ച് താന്‍ നല്‍കിയ കത്ത് മാധ്യമങ്ങളും സര്‍ക്കാരും ഏറ്റെടുത്ത ശേഷമാണ് അന്തിമ വേതന ആനുകൂല്യങ്ങള്‍ പോലും കമ്പനി നല്‍കിയത്. ഈ മാസം 18 നാണ് ഫൈനല്‍ സെറ്റില്‍മെന്റ് തുക കൈമാറിയത്. ഇത്രയും മോശമായ പെരുമാറ്റമാണ് കമ്പനിയുടെ ഭാഗത്ത് നിന്നും ഉണ്ടായതെന്നും അവര്‍ ആരോപിച്ചു. ജൂലൈ 20നാണ് പൂനെയിലെ EY ജീവനക്കാരിയായ അന്നയെ താമസ സ്ഥലത്ത് മരിച്ച നിലയില്‍ കണ്ടെത്തിയത്. അന്നയുടെ സംസ്‌കാര ചടങ്ങില്‍ പോലും കമ്പിനിയെ പ്രതിനിധീകരിച്ച് ഒരാള്‍ പോലും പങ്കെടുത്തിരുന്നില്ല.

അമിത ജോലി ഭാരം മൂലം തന്റെ മകള്‍ മരിക്കാനിടയായ സാഹചര്യങ്ങള്‍ വ്യക്തമാക്കി അനിത അഗസ്റ്റിന്‍ EY ഗ്ലോബല്‍ ഇന്ത്യ മേധാവി രാജീവ് മേമാനിക്ക് കത്തയച്ചിരുന്നു. ഈ കത്ത് പുറത്തുവന്നതോടെ വലിയ വിമര്‍ശനമാണ് EY കമ്പനിക്കെതിരായി ഉയര്‍ന്നത്. ഇതിനു ശേഷമാണ് കമ്പനിയുടെ ഭാഗത്ത് നിന്ന് മന ഇടപെടലുകള്‍ ഉണ്ടായത്. രണ്ട് മാസങ്ങള്‍ക്ക് ശേഷം വേതന സംബന്ധമായ ഫൈനല്‍ സെറ്റില്‍മെന്റ് തുക നല്‍കിയതും. സെപ്റ്റംബര്‍ 18നാണ് ഫൈനല്‍ സെറ്റില്‍മെന്റ് തുകയായ 28.5 ലക്ഷം രുപ മാതാവിന്റെ അക്കൗണ്ടി ലെത്തിയത്.

അധിക ജോലി ചെയ്തതിന്റെ പേരില്‍ അന്നയ്ക്ക് അര്‍ഹമായി ലഭിക്കേണ്ട കോമ്പന്‍സേറ്ററി ഓഫ് പോലും ഇവൈയുടെ സബ്‌സിഡിയറി സ്ഥാപനമായ ബാട്‌ലി ബോയ് കമ്പിനി നല്‍കിയില്ലെന്ന് അനിത ആരോപിച്ചു. ബാട്‌ലി ബോയ്‌യുടെ ഓഡിറ്റിംഗ് വിഭാഗത്തിലാണ് അന്ന ജോലി ചെയ്തിരുന്നത്. കോമ്പന്‍സേറ്ററി ഓഫുകള്‍ അന്നയ്ക്ക് കൃത്യമായി നല്‍കിയിരുന്നുവെന്ന് മഹാരാഷ്ട തൊഴില്‍ വകുപ്പിനെ അറിയിച്ചത് കള്ളമാണെന്ന് അമ്മ പറഞ്ഞു.

അന്നയ്ക്ക് കമ്പിനിയില്‍ നിന്ന് ലഭിച്ച ഓഫര്‍ ലെറ്റര്‍ പ്രകാരം ജോലിക്കിടയില്‍ ആകസ്മിക നിര്യാണം സംഭവിച്ചാല്‍ ജീവനക്കാരിയുടെ മൊത്തം ശമ്പള പാക്കേജിന്റെ (CTC) മൂന്നിരട്ടി തുക നല്‍കുമെന്ന് വ്യക്തമാക്കിയിരുന്നു. അന്നയുടെ CTC തുക 9.5 ലക്ഷമായിരുന്നു. അത് പ്രകാരം 28.5 ലക്ഷം രൂപ കമ്പനി നല്‍കി. അല്ലാതെ മറ്റ് യാതൊരു ആനുകൂല്യങ്ങളൊന്നും നല്‍കിയിട്ടില്ലെന്നും അനിത പറഞ്ഞു. അധിക ജോലിക്ക് അര്‍ഹമായ ആനുകൂല്യങ്ങള്‍ നല്‍കിയെന്ന കമ്പിനിയുടെ അവകാശ വാദങ്ങള്‍ പൂര്‍ണമായും തള്ളുകയാണ് അന്നയുടെ മാതാപിതാക്കള്‍.