മുട്ടവിറ്റ് മുട്ടസ്വാമിയായി; എടുത്തണിഞ്ഞത് കാഥികന്‍റെയും അധ്യാപകന്‍റെ റോളുകള്‍; ശ്രീതുവിന്റെ താന്ത്രിക ഗുരു ദേവീദാസന്റെ കഥ..

ബാലരാമപുരത്ത് രണ്ടു വയസുകാരി ദേവേന്ദുവിന്‍റെ മരണവുമായി ബന്ധപ്പെട്ടാണ് മന്ത്രവാദി ശംഖുമുഖം ദേവീദാസനെ പോലീസ് കസ്റ്റഡിയില്‍ എടുത്തത്. ഇയാള്‍ തന്നില്‍ നിന്നും പണം തട്ടി എന്ന ദേവേന്ദുവിന്‍റെ അമ്മ ശ്രീതുവിന്റെ മൊഴിയിലാണ് മന്ത്രവാദി കുടുങ്ങിയത്.

ശംഖുമുഖം കരിക്കകത്താണ് ഇയാള്‍ മന്ത്രവാദ ക്രിയകളുമായി കഴിഞ്ഞത്. കഴിഞ്ഞ ഏഴുവര്‍ഷമായി കരിക്കകത്തെ ഈ വീട്ടിലുണ്ട്. ഇവിടെ എത്തിയാണ് ദേവീദാസനെ പോലീസ് പൊക്കിയത്. രാത്രി വൈകി ഇവിടെ പൂജകളും മന്ത്രവാദങ്ങളും നടക്കാറുണ്ട് എന്നാണ് നാട്ടുകാര്‍ പോലീസിന് നല്‍കിയ മൊഴി. ആഭിചാരക്രിയകള്‍ നടത്തുന്നതിനാല്‍ കുട്ടിയുടെ മരണത്തില്‍ ഇയാള്‍ക്കും പങ്കുണ്ടോ എന്ന അന്വേഷണവും നടക്കുന്നുണ്ട്.

മന്ത്രവാദക്രിയകളില്‍ ശ്രീതു ദേവീദാസന്‍റെ സഹായിയാണ്. സാമ്പത്തിക തട്ടിപ്പ് ആരോപണമാണ് തന്റെ ഗുരുവിനെതിരെ ശ്രീതു ഉയര്‍ത്തിയിരിക്കുന്നത്. ദേവേന്ദുവിനെ കിണറ്റില്‍ എറിഞ്ഞ് കൊന്നതുമായി ഇയാള്‍ക്ക് എന്തെങ്കിലും രീതിയില്‍ ബന്ധമുണ്ടോ എന്നും പോലീസ് അന്വേഷിക്കുന്നുണ്ട്.

ആദ്യം പാരലല്‍ കോളജ് അധ്യാപകന്‍ എന്ന രീതിയിലാണ് അറിയപ്പെട്ടത്. എസ്.പി.കുമാര്‍ എന്ന പേരില്‍ കാഥികനുമായി. ഇതിനിടയില്‍ മുട്ടവിറ്റ് മുട്ടസ്വാമി എന്ന പേരിലും അറിയപ്പെട്ടു. പിന്നീട് മന്ത്രവാദക്രിയകള്‍ തുടങ്ങി. ശംഖുമുഖം ദേവീദാസന്‍ എന്ന പേരും സ്വീകരിച്ചു. ദേവേന്ദുവിന്‍റെ മരണത്തില്‍ പ്രതിയായ ഹരികുമാറും ഇയാളുടെ ശിഷ്യനായിരുന്നു. എന്നാല്‍ ഹരികുമാറിനെ പിന്നീട് പറഞ്ഞുവിട്ടു എന്നാണ് ദേവിദാസന്‍ പറഞ്ഞത്.

ശ്രീതുവും ഇയാളുടെ ശിഷ്യയായിരുന്നു. ഒരു സഹായി എന്ന രീതിയിലാണ് കൂടെ കൊണ്ടുപോയത്. സ്ഥലം വാങ്ങാനായി 30 ലക്ഷം രൂപ ദേവീദാസന് നല്‍കിയെന്നും ഈ പണം തട്ടിച്ചു എന്നും ചൂണ്ടിക്കാട്ടി ശ്രീതു പേട്ട സ്‌റ്റേഷനില്‍ പരാതി നല്‍കിയിരുന്നു. ഇതോടെയാണ് കേസില്‍ ഇയാളും ഉള്‍പ്പെട്ടത്.

പൂജപ്പുര വനിതാ കേന്ദ്രത്തിലാണ് ശ്രീതു ഉള്ളത്. ശ്രീതുവിനെ ഇന്നു വീണ്ടും ചോദ്യം ചെയ്യും. ദേവേന്ദുവിന്റെ കൊലപാതകത്തില്‍ സംശയകണ്ണുകള്‍ അമ്മ ശ്രീതുവിലേക്കും നീങ്ങുകയാണ്. ശ്രീതുവിന്റെ സഹോദരനായ ഹരികുമാർ ഒറ്റയ്ക്ക് കൃത്യം ചെയ്യില്ലെന്നാണ് അയല്‍ക്കാര്‍ പറയുന്നത്. ഇവരില്‍ ചിലരുടെ മൊഴി പോലീസ് രേഖപ്പെടുത്തിയിട്ടുണ്ട്.

ഇന്നലെ രാവിലെയാണ് ബാലരാമപുരത്തെ ശ്രീതു-ശ്രീജിത്ത് ദമ്പതിമാരുടെ മകൾ ദേവേന്ദുവിനെ വീട്ടുമുറ്റത്തെ കിണറ്റിൽ മരിച്ചനിലയിൽ കണ്ടെത്തിയത്. ഈ മരണത്തിലാണ് ഹരികുമാറിനെ കസ്റ്റഡിയില്‍ എടുത്തത്. കേസിലെ പ്രതി ഹരികുമാറിനെ വൈകീട്ടോടെ കോടതിയില്‍ ഹാജരാക്കും.