കടുവകൾക്ക് വിജയത്തുടക്കം; അഫ്ഗാനെ തകർത്തത് 6 വിക്കറ്റിന്

ധർമ്മശാല: ഏകദിന ക്രിക്കറ്റ് ലോകകപ്പിൽ ബം​ഗ്ലാദേശിന് വിജയത്തുടക്കം. ആറ് വിക്കറ്റിനാണ് ബംഗ്ലാദേശ് മറ്റൊരു ഏഷ്യൻ ടീമായ അഫ്​ഗാനിസ്താനെ പരാജയപ്പെടുത്തിയത്. ടോസ് നേടിയ ബംഗ്ലാദേശ് അഫ്​ഗാനിസ്താനെ ബാറ്റിംഗിനയക്കുകയായിരുന്നു.

ഓപ്പണർ റഹ്മനുള്ളാഹ് ഗുര്‍ബാസാണ് ( 62 പന്തിൽ 47 ) അഫ്ഗാൻ നിരയിലെ ടോപ് സ്കോറർ. 37.2 ഓവറില്‍ വെറും 156 റൺസ് മാത്രമാണ് അഫ്​ഗാനിസ്താന് നേടാനായത്. മൂന്ന് വിക്കറ്റ് വീതം വീഴ്ത്തിയ ക്യാപ്റ്റൻ ഷാക്കിബ് അൽ ഹസൻ, മെഹ്ദി ഹസൻ എന്നിവരാണ് അഫ്ഗാനെ തകർത്തത്. ഷോരിഫുൾ ഇസ്ലാം രണ്ട് വിക്കറ്റെടുത്തു.

മറുപടി ബാറ്റിംഗിനിറങ്ങിയ ബം​ഗ്ലാദേശ് തകർച്ചയോടെയാണ് തുടങ്ങിയത്. 27 റണ്‍സിനിടെ തന്‍സിദ് ഹസന്‍ ലിറ്റണ്‍ ദാസ് (13) എന്നിവരുടെ വിക്കറ്റുകൾ വീണു. മൂന്നാം വിക്കറ്റില്‍ മെ​ഹിദി ഹസ്സൻ – നജ്മുൾ ഹൂസൈൻ ഷാന്റോ എന്നിവർ 97 റൺസിന്റെ കൂട്ടുകെട്ട് പടുത്തുയർത്തി.

മെഹിദി ഹസ്സൻ 57 റൺസെടുത്തു പുറത്തായി. പിന്നാലെ വന്ന ഷക്കീബ് അൽ ഹസ്സൻ 14 റൺസെടുത്ത് മടങ്ങി. നജ്മുൾ ഹൂസൈൻ ഷാന്റോ 59 റൺസെടുത്ത് പുറത്താകാതെ ബം​ഗ്ലാദേശിനെ വിജയത്തിലെത്തിക്കുകയായിരുന്നു. അഫ്ഗാനുവേണ്ടി ഫസൽഹഖ് ഫാറൂഖി, നവീൻ ഉൾ ഹഖ്, അസ്മത്തുള്ള ഒമർസായ് എന്നിവർ ഓരോ വിക്കറ്റ് വീതം നേടി.