ബിജു മേനോനും ആസിഫ് അലിയും നേര്‍ക്കുനേര്‍; ജിസ് ജോയ് ചിത്രം ‘തലവന്‍’ മെയ് 24ന് തിയറ്ററുകളിലേക്ക്; ക്ലീന്‍ എന്റര്‍ടെയ്‌നറെന്ന് അണിയറപ്രവര്‍ത്തകര്‍

പ്രേക്ഷകര്‍ ഏറെ പ്രതീക്ഷയോടെ കാത്തിരിക്കുന്ന ചിത്രമാണ് ജിസ് ജോയ് സംവിധാനം ചെയ്യുന്ന തലവന്‍. ആസിഫ് അലിയും ബിജു മേനോനും മുഖ്യ വേഷങ്ങളില്‍ എത്തുന്ന ചിത്രം മെയ് 24ന് തിയറ്ററുകളില്‍ റിലീസ് ചെയ്യും. പൊലീസ് കഥയായി ഒരുക്കിയിരിക്കുന്ന ചിത്രം ഒരു ക്ലീന്‍ എന്റര്‍ടെയ്‌നറായിരിക്കുമെന്ന് അണിയറപ്രവര്‍ത്തകര്‍ അവകാശപ്പെടുന്നു. രണ്ടു പൊലീസ് ഉദ്യോഗസ്ഥരുടെ നേതൃത്വത്തില്‍ നടക്കുന്ന ഒരു കേസിന്റെ അന്വേഷണമാണ് ചിത്രത്തിന്റെ പശ്ചാത്തലം.

വ്യത്യസ്ത റാങ്കുകളിലുള്ള പൊലീസ് ഉദ്യോഗസ്ഥരുടെ ഇടയിലെ ഈഗോ പ്രസ്ശനങ്ങളും കിടമത്സരങ്ങളുമാണ് ചിത്രത്തിന്റെ പ്രമേയം. പൊലീസ് ഉദ്യോഗസ്ഥരുടെ വേഷത്തിലാമ് ആസിഫ് അലിയും ബിജു മേനോനും എത്തുന്നത്. അരുൺ നാരായൺ പ്രൊഡക്ഷൻസിന്റെയും ലണ്ടൻ സ്റ്റുഡിയോസിന്റെയും ബാനറുകളില്‍ അരുൺ നാരായൺ, സിജോ സെബാസ്റ്റ്യൻ എന്നിവർ നിർമിക്കുന്ന ചിത്രം ത്രില്ലർ മൂഡിലാണ് കഥ പറയുന്നത്.

ഈശോ, ചാവേർ എന്നീ ചിത്രങ്ങൾക്ക് ശേഷം അരുൺ നാരായൺ പ്രൊഡക്ഷൻസ് നിർമ്മിക്കുന്ന ഈ ചിത്രം മലബാറിലെ നാട്ടിൻപുറങ്ങളെ പ്രധാന പശ്ചാത്തലമാക്കി ഒരുക്കുന്ന ഇൻവെസ്റ്റിഗേറ്റീവ് ത്രില്ലറാണ്. അനുശ്രീ, മിയ, ദിലീഷ് പോത്തൻ, കോട്ടയം നസീർ, ശങ്കർ രാമകൃഷ്ണൻ, ജോജി കെ. ജോൺ, ദിനേശ്, അനുരൂപ്, നന്ദൻ ഉണ്ണി, ബിലാസ് എന്നിവരും ചിത്രത്തിലെ പ്രധാന കഥാപാത്രങ്ങളെ അവതരിപ്പിക്കുന്നുണ്ട്.