‘സുധാകരനും സതീശനും ആശംസകൾ’; സന്ദീപ് വാര്യർ കോൺഗ്രസിൽ ചേർന്നതിൽ കെ സുരേന്ദ്രൻ്റെ പരിഹാസം

സംസ്ഥാന വക്താവ് സന്ദീപ് വാര്യർ കോൺഗ്രസിൽ ചേർന്നതിൽ പ്രതികരണവുമായി ബിജെപി സംസ്ഥാന അധ്യക്ഷൻ കെ സുരേന്ദ്രൻ. അപ്രസക്തമായ ഒരു പാർട്ടിയിലേക്കാണ് സന്ദീപ് പോയത്. അത് ബിജെപിയിൽ ഒരു ചലനവും ഉണ്ടാക്കാൻ പോകുന്നില്ലെന്നും അദ്ദേഹം മാധ്യമങ്ങളോട് പറഞ്ഞു. സന്ദീപ് ബലിദാനികളെ വഞ്ചിച്ചു. കെപിസിസി പ്രസിഡൻ്റ് കെ സുധാകരനും പ്രതിപക്ഷ നേതാവ് വിഡി സതീശനും എല്ലാ ആശംസകളും നേരുന്നതായും സുരേന്ദ്രൻ പരിഹസിച്ചു.

സന്ദീപ് കോൺഗ്രസിൽ നീണാൾ വാഴട്ടെ എന്ന് പറത്ത പറഞ്ഞ സുരേന്ദ്രൻ കസേര കിട്ടിയില്ലെന്ന് പറഞ്ഞാണ് സന്ദീപ് പാർട്ടി വിട്ടതെന്നും ചൂണ്ടിക്കാട്ടി. ബിജെപിയിൽ ലഭിച്ചതിനേക്കാൾ വലിയ കസേര കോൺഗ്രസിൽ അദ്ദേഹത്തിന് കിട്ടട്ടെ. അതിനായി എല്ലാ ആശംസകളും നേരുന്നുവെന്നും സുരേന്ദ്രൻ പറഞ്ഞു.

Also Read: സന്ദീപ് വാര്യര്‍ ബിജെപി വിട്ട് കോണ്‍ഗ്രസിലേക്ക്; അമ്പരിപ്പിച്ച് യുവ നേതാവ്

ബിജെപി സംസ്ഥാന അധ്യക്ഷൻ കെസുരേന്ദ്രനും സംഘവുമാണ് താൻ കോൺഗ്രസിലേക്ക് വരാനുള്ള കാരണമെന്നായിരുന്നു സന്ദീപ്‌ വാര്യർ ഇന്ന് വ്യക്തമാക്കിയത്. രാഷ്ട്രീയത്തിനപ്പുറം വ്യക്തിപരമായ ബന്ധങ്ങളും മാനവിക അടുപ്പങ്ങളും നിലനിൽക്കണമെന്നാണ് എക്കാലത്തും ആഗ്രഹിച്ചിട്ടുള്ളത്. സ്നേഹത്തിന്റെ കടയിൽ അംഗത്വം എടുക്കുന്നുവെന്നും കോൺഗ്രസിൽ ചേർന്ന തീരുമാനം അറിയിച്ചു കൊണ്ട് സന്ദീപ് പറഞ്ഞു.ഒറ്റുകാരന്റെ വിശേഷണം ചേരുന്നത് തനിക്കല്ല, ബിജെപി നേതൃത്വത്തിനാണ്. ബിജെപി പ്രവർത്തകർ ചോദ്യം ചെയ്യേണ്ട തന്നെയല്ല, പാർട്ടി നേതൃത്വത്തെയാണെന്നും സന്ദീപ് കൂട്ടിച്ചേര്‍ത്തു.

Also Read: കോൺഗ്രസിൽ നിറയെ പ്രശ്നങ്ങളെന്ന് പിവി അൻവർ; ‘ലീഗ് ആണ് പ്രിയങ്കക്കായി പ്രവർത്തിച്ചത്’

പാലക്കാട് നടന്ന കെപിസിസി വാർത്താ സമ്മേളനത്തിലാണ് കെ സുധാകരൻ സന്ദീപിനെ പാർ‌ട്ടിയിലേക്ക് സ്വാ​ഗതം ചെയ്തത്. സന്ദീപ് വാര്യരും വാർത്താ സമ്മേളനത്തിൽ പങ്കെടുത്തിരുന്നു. പ്രതിപക്ഷ നേതാവ്, കെപിസിസി പ്രസിഡന്റ് തുടങ്ങി കോൺ​ഗ്രസിലെ മുതിർന്ന നേതാക്കൾ വാർത്താ സമ്മേളനത്തിൽ പങ്കെടുത്തിരുന്നു. വേദിയിൽവെച്ച് കെ സുധാകരൻ സന്ദീപ് വാര്യരെ ഷാൾ അണിയിച്ചു സ്വീകരിച്ചു. വെറുപ്പിൻ്റെ രാഷ്ട്രീയം ഉപേക്ഷിച്ച് സന്ദീപ് വാര്യർ കോൺഗ്രസൻ്റെ സ്നേഹ തണലിലേക്കെന്ന് വിഡി സതീശൻ പറഞ്ഞു.