ചൈനയിൽ വ്യായാമം ചെയ്യുന്നവര്‍ക്ക് ഇടയിലേക്ക് കാർ ഇടിച്ചു കയറ്റി; 35 മരണം; നിരവധി പേര്‍ക്ക് പരുക്ക്

ചൈനയിലെ ഷുഹായിൽ സ്റ്റേഡിയത്തിൽ വ്യായാമം ചെയ്യുകയായിരുന്നവര്‍ക്ക് ഇടയിലേക്ക് കാര്‍ ഇടിച്ചുകയറി 35 പേർ കൊല്ലപ്പെട്ടു. 43 പേർക്ക് പരുക്കേറ്റിട്ടുമുണ്ട്. എസ് യുവിയാണ് ഒരാള്‍ ഓടിച്ചുകയറ്റിയത്. പരുക്കേറ്റവരിൽ പ്രായമായവരും കൗമാരക്കാരും കുട്ടികളുമുണ്ടെന്ന് ചൈനീസ് മാധ്യമങ്ങൾ റിപ്പോർട്ട് ചെയ്തു.

അക്രമം നടത്തിയ ആള്‍ക്ക് ഗുരുതരമായ പരുക്കേറ്റിട്ടുണ്ട്. ഇയാള്‍ അബോധാവസ്ഥയില്‍ ആയതിനാല്‍ ചോദ്യം ചെയ്യാന്‍ കഴിഞ്ഞിട്ടില്ല. വിവാഹമോചനത്തെ തുടർന്നുള്ള അതൃപ്തിയാണ് ഇയാളുടെ ആക്രമണത്തിന് പിന്നില്‍ എന്ന വിവരമാണ് പോലീസിന് ലഭിച്ചത്.

സ്റ്റേഡിയത്തിന് ഉള്ളിലുള്ള നടപ്പാതയിലൂടെ നടക്കുന്നവരാണ് ആക്രമണത്തിന് ഇരയായത്. ഇവരെയെല്ലാം കാര്‍ കൊണ്ട് ഇടിച്ചു വീഴ്ത്തുകയായിരുന്നു. അമിതവേഗത്തിലാണ് കാര്‍ ഓടിച്ചത്. അതിനാല്‍ പലര്‍ക്കും ഓടിമാറാന്‍ കഴിഞ്ഞില്ല. ഇതുകൊണ്ടാണ് മരണസംഖ്യ ഉയര്‍ന്നത്.