ജനനം മുതല്‍ ഒടുങ്ങാത്ത വേദനകള്‍; ലൈംഗികചൂഷണം പലവട്ടം; ലഹരിക്കും അടിമയാക്കി; അനാഥയായെത്തി 19 വയസില്‍ ആ പെണ്‍ജന്മം മടങ്ങുമ്പോള്‍

ചോറ്റാനിക്കരയിലെ പോക്‌സോ കേസ് അതിജീവിത അതിക്രൂര അതിക്രമത്തിന് ഇരയായപ്പോൾ മാത്രമാണ്, പിറവിയിലേ അനാഥയായി ആരോരുമില്ലാമില്ലാതെ ഈ ഭൂമിയിൽ 19 വർഷം കഴിയാൻ വിധിക്കപ്പെട്ട ആ പെൺകുട്ടിയെക്കുറിച്ച് പുറംലോകം അറിയുന്നത്. ലൈംഗിക ചൂഷണത്തിന് ഇരയായത് നിരവധി തവണയാണ്. ഒടുവില്‍ ക്രൂരമായി കൊല്ലപ്പെടുന്നതിന് തൊട്ടുമുമ്പ് പോലും ബലമായ ലൈംഗിക പീഡനത്തിന് ഇരയായി. മരണവെപ്രാളത്തില്‍ തൂങ്ങിയാടുമ്പോള്‍ പ്രീയപ്പെട്ടവനെന്ന് കരുതിയവന്‍ ചിരിയോടെ നോക്കി നില്‍ക്കുന്നതും കണ്ടാണ് ആ പെണ്‍കുട്ടി മടങ്ങുന്നത്.

ആരുടെ തെറ്റുകൊണ്ടാണെന്ന് അറിയാതെ അനാഥയായത് മുതല്‍ തുടങ്ങിയതാണ് ജീവിത ദുരന്തം. ദത്തെടുക്കലിലൂടെ ഒരു അച്ഛനേയും അമ്മയേയും ലഭിച്ചപ്പോള്‍ മാത്രം അൽപം സന്തോഷം അറിഞ്ഞു. എന്നാല്‍ അത് അധികം നീണ്ടുനിന്നില്ല. ചെന്നുപെട്ട്ത് മോശം കൂട്ടുകെട്ടായതോടെ ആ സന്തോഷം മാഞ്ഞു. ഇതിനിടെ സുഹൃത്തുക്കള്‍ക്കൊപ്പം ലഹരിയുടെ രുചിയറിഞ്ഞതോടെ ജീവിതം പൂര്‍ണ്ണമായും നഷ്ടമായി. അച്ഛനും അമ്മയും ശത്രുക്കളായി അകലാൻ തുടങ്ങി.

പതിനേഴാം വയസില്‍ ലൈംഗിക ചൂഷണത്തിന് ഇരയായതോടെ പേര് പോലും നഷ്ടമായി പോക്‌സോ അതിജീവിതയായി. സ്വകാര്യ ബസ് ജീവനക്കാരായ രണ്ടുപേരാണ് പെണ്‍കുട്ടിയെ ലൈംഗികമായി ചൂഷണം ചെയ്‌തെന്ന കേസിലെ പ്രതികള്‍. രണ്ട് വര്‍ഷങ്ങള്‍ക്ക് ശേഷമാണ് ഇതുസംബന്ധിച്ച് പരാതി നല്‍കിയത്. അറസ്റ്റിലായ പ്രതികൾ ഇപ്പോള്‍ ജാമ്യത്തിലാണ്. ഇതിനിടെ വളർത്തച്ഛന്‍ മരിച്ചു.

ഇതോടെ കുടുംബത്തിൽ നിന്നുള്ള അകൽച്ച പൂർണമായി. സോഷ്യല്‍ മീഡിയ സൗഹൃദങ്ങള്‍ വളര്‍ന്നു. പുതുതായി തുടങ്ങിയ ബന്ധങ്ങൾ ജീവിതത്തെ ലഹരി കൊണ്ട് നിറച്ചു. മരണത്തിലേക്ക് തള്ളിവിട്ട അനൂപിനെ പരിചയപ്പെട്ടതും ഇന്‍സ്റ്റഗ്രാമിലൂടെ. ലഹരി കൈമാറ്റം പതിവായിരുന്നു എന്ന് അനൂപ് തന്നെ പോലീസിന് കഴിഞ്ഞദിവസം മൊഴി നല്‍കിയിട്ടുണ്ട്. വീട്ടിലേക്ക് അനൂപിന്റെ സന്ദര്‍ശനം പതിവായതോടെ അമ്മ ആദ്യം വിലക്കി. ഫലമില്ലാതെ വന്നതോടെ അവർ വീട് ഉപേക്ഷിച്ചുപോയി.

ഇതോടെ അനൂപ് ഉള്‍പ്പെടെയുള്ള സുഹൃത്തുക്കള്‍ വീട്ടില്‍ എത്തുന്നത് പതിവായി. നാട്ടുകാര്‍ ഇതുചോദ്യം ചെയ്തതോടെ പ്രശ്‌നങ്ങളും പതിവായിരുന്നു. അയല്‍ക്കാരുമായുളള ഈ തര്‍ക്കം കൊണ്ടുതന്നെയാണ് ആ രാത്രിയില്‍ പെണ്‍കുട്ടി ക്രൂരമായി മര്‍ദ്ദനമേറ്റ് മണിക്കൂറുകളോളം അബോധാവസ്ഥയില്‍ കിടന്നിട്ടും ആരും അറിയാതെ പോയത്.