ഡല്‍ഹിയില്‍ മുഖ്യമന്ത്രി-ഇപി കൂടിക്കാഴ്ച; പിണറായിയെ കണ്ടതില്‍ പുതുമയില്ലെന്ന് പ്രതികരണം
ഇടതുമുന്നണി കണ്‍വീനര്‍ സ്ഥാനത്തും നിന്നും നീക്കിയതിലുള്ള അതൃപ്തിയില്‍ തുടരുന്ന ഇ.പി.ജയരാജന്‍ മുഖ്യമന്ത്രി പിണറായി വിജയനുമായി കൂടിക്കാഴ്ച നടത്തി. ഡല്‍ഹി കേരള ഹൗസില്‍ വച്ചായിരുന്നു കൂടിക്കാഴ്ച. സിപിഎം ജനറല്‍ സെക്രട്ടറി സീതാറാം യെച്ചൂരിയുടെ വിയോഗത്തെ തുടര്‍ന്നാണ് മുഖ്യമന്ത്രിയും ഇപിയും ഡല്‍ഹിയില്‍ എത്തിയത്.
കൂടിക്കാഴ്ചയെക്കുറിച്ച് മാധ്യമങ്ങളുമായി പ്രതികരിക്കാന്‍ ഇപി തയ്യാറായില്ല. പിണറായിയെ കാണുന്നതില്‍ പുതുമയില്ലെന്നും മുഖ്യമന്ത്രിയെ കാണാറും സംസാരിക്കാറുമുണ്ട് എന്നുമാണ് ഇപി പറഞ്ഞത്. മുഖ്യമന്ത്രിയോട് സംസാരിച്ച എല്ലാ കാര്യങ്ങളും മാധ്യമങ്ങളോട് പറയണോ എന്നും അദ്ദേഹം ചോദിച്ചു. “രാഷ്ട്രീയ കാര്യങ്ങള്‍ ചര്‍ച്ച ചെയ്യാനുള്ള സമയമല്ലിത്. രാഷ്ട്രീയമെല്ലാം അതിന്‍റെ വേദിയില്‍ ചര്‍ച്ച ചെയ്യും. ഇപ്പോള്‍ യെച്ചൂരിയെക്കുറിച്ചുമാത്രം ചോദിച്ചാല്‍ മതി.” – ഇപി പറഞ്ഞു.
ഈയിടെ നടന്ന ചടയൻ ഗോവിന്ദൻ അനുസ്മരണത്തിൽനിന്നും ഇപി വിട്ടുനിന്നത് വാര്‍ത്തകളില്‍ ഇടംപിടിച്ചിരുന്നു. ബിജെപി കേരള പ്രഭാരി പ്രകാശ് ജാവഡേക്കറെ കണ്ടതും ചര്‍ച്ച നടത്തിയതുമാണ് ഇപിക്ക് തിരിച്ചടിയായത്. കഴിഞ്ഞ ലോക്സഭാ തിരഞ്ഞെടുപ്പ് ദിവസം ഈ കൂടിക്കാഴ്ചയുമായി ബന്ധപ്പെട്ട് ഇപി നടത്തിയ പ്രതികരണം തിരഞ്ഞെടുപ്പില്‍ ക്ഷീണം ചെയ്തതായി സിപിഎം വിലയിരുത്തിയിരുന്നു. പാര്‍ട്ടി സമ്മേളനങ്ങള്‍ ആരംഭിക്കുന്നതിനു തൊട്ടുമുന്‍പാണ് ഇപിയെ ഇടതുമുന്നണി കണ്‍വീനര്‍ സ്ഥാനത്തു നിന്നും നീക്കി പാര്‍ട്ടി നടപടി എടുത്തത്.
കേരളം ചർച്ച ചെയ്യാനിരിക്കുന്ന വലിയ വാർത്തകൾ ആദ്യം അറിയാൻ മാധ്യമ സിൻഡിക്കറ്റ് വാട്സ്ആപ്പ് ഗ്രൂപ്പിൽ ജോയിൻ ചെയ്യാം
Click here
