കോണ്‍ഗ്രസിന്റെ വമ്പന്‍ നീക്കം; ഭരണമുള്ള ഹിമാചലില്‍ പാര്‍ട്ടി ഘടകം അപ്പാടെ പിരിച്ചുവിട്ടു

ഹിമാചൽ പ്രദേശിലെ കോൺ​ഗ്രസ് കമ്മിറ്റികള്‍ പിരിച്ചുവിട്ടു. സംസ്ഥാന കമ്മിറ്റിയുൾപ്പെടെയാണ് പിരിച്ചുവിട്ടത്. ജില്ലാ പ്രസിഡന്റുമാരെ നീക്കുകയും ബ്ലോക്ക് കോൺ​ഗ്രസ് കമ്മിറ്റികള്‍ പിരിച്ചുവിടുകയും ചെയ്തിട്ടുണ്ട്.

കോൺഗ്രസിന് മുഖ്യമന്ത്രിയുള്ള മൂന്ന് സംസ്ഥാനങ്ങളിൽ ഒരു സംസ്ഥാനമാണ് ഹിമാചൽ പ്രദേശ്. ഇവിടെയാണ് കോണ്‍ഗ്രസ് ഘടകം പിരിച്ചുവിട്ടത്. ഹിമാചലിലെ കോൺ​ഗ്രസ് കമ്മിറ്റി പിരിച്ചുവിട്ടതിനെക്കുറിച്ച് വിശദീകരിക്കുന്ന എഐസിസിയുടെ കത്ത് പുറത്തുവന്നിട്ടുണ്ട്. കെ.സി. വേണു​ഗോപാലിന്റെ പേരിലാണ് കത്ത്.

അന്തരിച്ച മുൻ മുഖ്യമന്ത്രി വീർഭദ്രസിങ്ങിന്‍റെ ഭാര്യ പ്രതിഭ സിങ്ങാണ് കോൺഗ്രസ് ഹിമാചല്‍ ഘടകം അധ്യക്ഷ. 2022ലാണ് ഇവര്‍ നിയമിതയായത്.

2019-ലും സമാനമായ നീക്കം കോണ്‍ഗ്രസ് നടത്തിയിരുന്നു. സംസ്ഥാന ഘടകം പിരിച്ചുവിട്ടു. എന്നാൽ കുൽദീപ് സിംഗ് റാത്തോറിനെ പ്രസിഡന്റ് ആയി നിലനിർത്തിയിരുന്നു