രാജ്യത്തെ കോവിഡ് കേസുകള്‍ മൂവായിരത്തിലേക്ക്; കേരളത്തില്‍ മാത്രം 2606 കേസുകള്‍

തിരുവനന്തപുരത്ത്: സംസ്ഥാനത്ത് 24 മണിക്കൂറിനിടെ 265 കോവിഡ് പോസിറ്റീവ് കേസുകള്‍. കേന്ദ്ര ആരോഗ്യമന്ത്രാലയത്തിന്റെ കണക്കനുസരിച്ച് ഇന്നലെ രാജ്യത്ത് 328 പേര്‍ക്കാണ് കോവിഡ് ബാധിച്ചിരിക്കുന്നത്. ഇതോടെ കോവിഡ് ആക്ടീവ് കേസുകള്‍ 2997 ആയി. ഇതില്‍ 2606 രോഗികളും കേരളത്തിലാണ്. 1 കോവിഡ് മരണവും സംസ്ഥാനത്ത് റിപ്പോര്‍ട്ട് ചെയ്തിട്ടുണ്ട്. ആന്ധ്രാപ്രദേശ് 4, അസം 1, തമിഴ്‌നാട് 104, ചത്തീസ്ഗഡ് 3, ബീഹാര്‍ 2, ഗുജറാത്ത് 32, ജമ്മു കാശ്മിര്‍ 3, കര്‍ണാടക 105, മഹാരാഷ്ട്ര 53, മധ്യപ്രദേശ് 3, പഞ്ചാബ് 4, ജാര്‍ഖണ്ഡ് 2, ഡല്‍ഹി 3, ഗോവ 16, ഹരിയാന 1, പോണ്ടിച്ചേരി 27, തെലുങ്കാന 19, രാജസ്ഥാന്‍ 5, ഉത്തര്‍പ്രദേശ് 4 എന്നിങ്ങനെയാണ് മറ്റ് സംസ്ഥാനങ്ങളിലെ കോവിഡ് കണക്കുകള്‍.

കോവിഡ് കേസുകള്‍ വര്‍ദ്ധിച്ചതോടെ സംസ്ഥാനങ്ങള്‍ക്ക് ജാഗ്രതാ നിര്‍ദ്ദേശം കേന്ദ്ര ആരോഗ്യ മന്ത്രാലയം നല്‍കിയിരുന്നു. കോവിഡ് കേസുകള്‍ കൂടുതല്‍ റിപ്പോര്‍ട്ട് ചെയ്ത കേരളത്തിന് പ്രത്യേക ജാഗ്രതാ നിര്‍ദ്ദേശം നേരത്തെ കേന്ദ്ര ആരോഗ്യമന്ത്രാലയം നല്‍കിയിട്ടുണ്ട്. പരിശോധന ശക്തമാക്കണം, ആള്‍ക്കൂട്ടത്തിലൂടെ രോഗം പടരാതെ നോക്കണം. ആര്‍ടിപിസിആര്‍, ആന്റിജന്‍ പരിശോധനകള്‍ വര്‍ദ്ധിപ്പിക്കണം. പോസിറ്റീവ് സാമ്പിളുകള്‍ ജനിതക ശ്രേണീ പരിശോധന നടത്തണം. രോഗ വിവരങ്ങള്‍ കേന്ദ്രവുമായി പങ്കുവയ്ക്കണം തുടങ്ങിയ നിര്‍ദേശങ്ങളാണ് കേന്ദ്രം നല്‍കിയിരിക്കുന്നത്. ഇതിന്റെ അടിസ്ഥാനത്തില്‍ ആശുപത്രികളിലുള്ള ഐസൊലേഷന്‍ വാര്‍ഡുകള്‍, റൂമുകള്‍, ഓക്സിജന്‍ കിടക്കകള്‍, ഐസിയു കിടക്കകള്‍, വെന്റിലേറ്റുകള്‍ എന്നിവയുടെ ലഭ്യത ഉറപ്പ് വരുത്തുന്നതടക്കമുള്ള നടപടികള്‍ ആരോഗ്യ വകുപ്പ് സ്വീകരിച്ചിട്ടുണ്ട്. പനിയടക്കമുളള രോഗലക്ഷണമുള്ളവര്‍ക്ക് കോവിഡ് പരിശോധന കൂടി നടത്താനും നിര്‍ദ്ദേശം നല്‍കിയിട്ടുണ്ട്.

സംസ്ഥാനത്ത് പനി ബാധിതരുടെ എണ്ണത്തിലും വലിയ വര്‍ദ്ധനവാണുള്ളത്. പ്രതിദിനം പതിനായിരത്തിലധികം പനി ബാധിതരാണ് സംസ്ഥാനത്തെ സര്‍ക്കാര്‍ ആശുപത്രികളില്‍ ചികിത്സ തേടുന്നത്. ഡെങ്കി ബാധിതരുടെ എണ്ണവും വര്‍ദ്ധിക്കുന്നുണ്ട്.