രമേശ് ചെന്നിത്തലയെ പുകഴ്ത്തി സിപിഎം എംഎല്‍എ; കുത്തിത്തിരുപ്പ് നടത്തി വന്നവനെന്ന് സതീശന് പരിഹാസവും

മുന്‍ പ്രതിപക്ഷ നേതാവ് രമേശ് ചെന്നിത്തലയെ പ്രശംസിച്ച് സിപിഎം എംഎല്‍എ വി ജോയി. എഡിജിപിയുടെ ആര്‍എസ്എസ് കൂടിക്കാഴ്ച സംബന്ധിച്ചുള്ള അടിയന്തര പ്രമേയത്തില്‍ ചര്‍ച്ച നടക്കുന്നതിനിടയിലാണ് ഈ അസാധാരണ പരാമര്‍ശം ഉണ്ടായത്. പ്രതിപക്ഷ നേതാവ് വിഡി സതീശനെ വിമര്‍ശിക്കുന്നതിനിടയിലായിരുന്നു ഈ പുകഴ്ത്തല്‍.

നന്നായി പ്രവര്‍ത്തിച്ചിരുന്ന അനുഭസമ്പത്തുളള രമേശ് ചെന്നിത്തലയെ കുത്തിമറിച്ചാണ് വിഡി സതീശന്‍ പ്രതിപക്ഷ നേതാവായത് എന്നായിരുന്നു ജോയിയുടെ പ്രസംഗം. കോണ്‍ഗ്രസിലെ മറ്റ് നേതാക്കളെ ആരേയും കുറിച്ച് പക്വതയില്ല എന്ന വിമര്‍ശനം ഉന്നയിച്ചിട്ടില്ല. എന്നാല്‍ സതീശനെതിരെ അത് പറയാന്‍ കാരണമുണ്ട്. ഏതെങ്കിലും ഒരു സംഘടനയുടെ പ്രധാന ഭാരവാഹിയായി ഇരുന്നയാളല്ല സതീശന്‍. കെഎസ്‌യു, യൂത്ത് കോണ്‍ഗ്രസ്, ഡിസിസി, കെപിസിസി എന്നിവിടങ്ങളിലൊന്നും പ്രവര്‍ത്തിച്ചിട്ടില്ല. കോണ്‍ഗ്രസിനകത്ത് കുത്തിതിരുപ്പ് നടത്തി പ്രതിപക്ഷ നേതാവായ ആളാണ് സതീശനെന്നും ജോയി ആരോപിച്ചു.