‘ഇതൽപം കടുത്തുപോയി’; തലയിൽ കൈവച്ച് ക്രിസ്റ്റ്യാനോയുടെ യുട്യൂബ് എതിരാളികൾ

കളിക്കളത്തിലും യൂട്യൂബിലും ഒരുപോലെ റെക്കോർഡുകൾ കടപുഴക്കി പോർച്ചുഗൽ ഫുട്ബാൾ ഇതിഹാസ താരം ക്രിസ്റ്റ്യാനോ റൊണാൾഡോ മുന്നോട്ട്. ‘യുആർ ക്രിസ്റ്റ്യാനോ’ എന്ന ചാനൽ തുടങ്ങി ഗോൾഡൺ ബട്ടണും ഡയമണ്ട് ബട്ടണും മണിക്കൂറുകൾക്കകം സ്വന്തമാക്കിയ താരം വെറും ആറ് ദിവസം കൊണ്ട് യുട്യൂബിന്റെ കസ്റ്റം പ്ലേ ബട്ടണും (50 മില്യൺ സബ്സ്ക്രൈബേഴ്സ്) തൻ്റെ പോക്കറ്റിലാക്കി.

ചാനൽ തുടങ്ങി ഒരാഴ്ചക്കുള്ളിൽ ഏറ്റവും കൂടുതൽ സബ്സ്ക്രൈബേഴ്സിനെ സ്വന്തമാക്കുന്ന യൂട്യൂബർ എന്ന നേട്ടമാണ് 5 കോടി കടന്നതിലൂടെ താരം സ്വന്തമാക്കിയത്. ആകെ 119 മില്യൺ സബ്സ്ക്രൈബേഴ്സുള്ള ‘ലൈക്ക് നാസ്ത്യ’ എന്ന ചാനലിനെയാണ് മറികടന്നത്. കുട്ടികൾക്ക് വേണ്ടിയുള്ള പരിപാടികൾ പോസ്റ്റ് ചെയ്യുന്ന ചാനൽ മൂന്ന് വർഷം കൊണ്ടാണ് 50 മില്യണിലെത്തിയത്. എന്നാല്‍ മൂന്ന് ദിവസങ്ങള്‍കൊണ്ട് താരം 40 മില്യൺ കടന്നിരുന്നു.

ALSO READ:  യൂട്യൂബ് വരുമാനം ക്രിസ്റ്റ്യാനോ എന്ത് ചെയ്യും; രണ്ട് ദിവസം കൊണ്ട് കിട്ടിയത്…

നിലവിൽ യൂട്യൂബിൽ 312 മില്യൺ വരിക്കാരുമായി ഒന്നാം സ്ഥാനത്തുള്ള ‘മിസ്റ്റർ ബീസ്റ്റ്’ പോലും 50 മില്യൺ കടന്നത് ഒൻപത് വർഷം കൊണ്ടാണ്. ഏറ്റവും വേഗത്തിൽ ഒരു കോടി (10 മില്യൺ) സബ്‌സ്‌ക്രൈബേഴ്സിനെ സ്വന്തമാക്കിയ മിസ്റ്റർ ബീസ്റ്റിൻ്റെ റെക്കോഡും ക്രിസ്റ്റ്യാനോ മറികടന്നിരുന്നു. 10 മില്യണിലേക്ക് എത്താൻ 132 ദിവസമെടുത്ത മിസ്റ്റർ ബീസ്റ്റിൻ്റെ റെക്കോർഡ് വെറും പത്ത് മണിക്കൂർ കൊണ്ടാണ് താരം തകർത്തത്. ആദ്യ 22 മിനിട്ടിൽ 1 ലക്ഷം വരിക്കാരെ മറികടന്ന താരം ഒന്നര മണിക്കൂറിനിടയിൽ വരിക്കാരുടെ എണ്ണം 1 ബില്യൺ (10 ലക്ഷം‌) ആക്കി. അര ദിവസം കൊണ്ട് 1 കോടിയും ‌24 മണിക്കൂർ കൊണ്ട് 2 കോടി സബ്സ്ക്രൈബേഴ്സിനെയും താരം സ്വന്തമാക്കിയിരുന്നു.

കളിക്കളത്തിലും റൊണാൾഡോ മുന്നേറ്റം തുടരുകയാണ്. ചൊവ്വാഴ്ച സൗദി ലീഗിൽ അൽ-ഫൈഹയ്‌ക്കെതിരെ നടന്ന മത്സരത്തിൽ കരിയറിലെ 899-ാമത് ഗോളാണ് നേടിയത്. ഇതോടെ തുടർച്ചയായി 23 സീസണുകളിൽ എതിരാളികളുടെ വല ഫ്രീകിക്കിലൂടെ കുലുക്കുന്ന ആദ്യ ഫുട്ബോളർ എന്ന നേട്ടവും സ്വന്തമാക്കി. തൻ്റെ 64-ാമത് ഫ്രീകിക്ക് ഗോൾ നേടിയ താരം അർജൻ്റീനൻ ഇതിഹാസ താരം ലയണൽ മെസിക്ക് തൊട്ടു പിന്നിലെത്തി. 65 ഗോളുമായി മെസിയാണ് പട്ടികയില്‍ ഒന്നാമത്. കഴിഞ്ഞ സീസണിൽ 45 മത്സരങ്ങളിൽ നിന്ന് 44 ഗോളുകൾ അടിച്ചുകൂട്ടിയ റൊണാള്‍ഡോ 13 അസിസ്റ്റുകളും നൽകിയിരുന്നു.