സൗബിന് ഇഡി കുരുക്ക്; ‘മഞ്ഞുമ്മല്‍ ബോയ്‌സ്’ നിര്‍മാണ തർക്കത്തിൽ ചോദ്യം ചെയ്യാൻ നോട്ടീസ് നൽകി; കള്ളപ്പണമിടപാടുണ്ടോ എന്നും പരിശോധന

പി. ചിദംബരം സംവിധാനം ചെയ്ത സൂപ്പര്‍ ഹിറ്റ് ചിത്രം മഞ്ഞുമ്മല്‍ ബോയ്‌സിന്റെ നിര്‍മാതാക്കള്‍ക്കെതിരെ എന്‍ഫോഴ്‌സ്‌മെന്റ് ഡയറക്ടറേറ്റ് (ഇഡി) അന്വേഷണം. നടന്‍ സൗബിന്‍ ഷാഹിറിന്റെ ഉടമസ്ഥതയിലുള്ള പറവ ഫിലിംസിന്റെ കള്ളപ്പണമിടപാടുകള്‍ അന്വേഷണ പരിധിയില്‍ ഉള്‍പ്പെടും. സൗബിന്‍ ഉള്‍പ്പെടെയുള്ളവരെ ചോദ്യം ചെയ്യാനാണ് തീരുമാനം.

സിനിമ മേഖലയുമായി ബന്ധപ്പെട്ട് വലിയ തോതിലുള്ള കള്ളപ്പണമിടപാടുകള്‍ നടക്കുന്നുണ്ട് എന്ന വിവരത്തെ തുടര്‍ന്നാണ് ഇഡി അന്വേഷണം എന്നാണ് റിപ്പോര്‍ട്ട്. നടന്മാരുടേതുള്‍പ്പെടെയുള്ള നിര്‍മാണ കമ്പനികളെ കേന്ദ്രീകരിച്ച് അന്വേഷണം നടക്കുന്നുണ്ട്. ഇതിനു പിന്നാലെയാണ് മഞ്ഞുമ്മല്‍ ബോയ്‌സ് എന്ന ചിത്രം കേന്ദ്രീകരിച്ച് വലിയ തട്ടിപ്പ് നടന്നു എന്ന ആരോപണം ഉയര്‍ന്നത്. 40 ശതമാനം ലാഭവിഹിതം നല്‍കാമെന്ന് പറഞ്ഞ് വിശ്വാസവഞ്ചന നടത്തി മുതല്‍മുടക്കുപോലും തിരിച്ചുനല്‍കിയില്ലെന്ന് ചൂണ്ടിക്കാട്ടി അരൂര്‍ സ്വദേശി സിറാജ് വലിയത്തറ ഹമീദ് നല്‍കിയ സ്വകാര്യ ഹര്‍ജിയില്‍ നേരത്തേ നിര്‍മാതാക്കള്‍ക്കെതിരെ പൊലീസ് കേസ് രജിസ്റ്റര്‍ ചെയ്തിരുന്നു. എറണാകുളം ജുഡീഷ്യല്‍ ഒന്നാം ക്ലാസ് മജിസ്ട്രേറ്റ് കോടതിയുടെ ഉത്തരവ് പ്രകാരമായിരുന്നു എറണാകുളം മരട് പോലീസ് കേസ് രജിസ്റ്റര്‍ ചെയ്തത്.

സിനിമയുടെ നിര്‍മ്മാതാക്കളായ ഷോണ്‍ ആന്റണി, സൗബിന്‍ ഷാഹിര്‍, ബാബു ഷാഹിര്‍ എന്നിവര്‍ക്കെതിരെയായിരുന്നു കേസ്. ക്രിമിനല്‍ ഗൂഢാലോചന, വിശ്വാസവഞ്ചന, വ്യാജരേഖ ചമക്കല്‍ എന്നീ കുറ്റങ്ങളാണ് ചുമത്തിയിട്ടുള്ളത്.

പറവ ഫിലിംസ് നിര്‍മ്മിച്ച മഞ്ഞുമ്മല്‍ ബോയ്‌സ് സിനിമയ്ക്ക് പണം മുടക്കിയാല്‍ 40 ശതമാനം ലാഭവിഹിതം നല്‍കാമെന്നായിരുന്നു വാഗ്ദാനം. ഇതുപ്രകാരം പല തവണകളിലായി 7 കോടി രൂപയാണ് പരാതിക്കാരന്‍ മുടക്കിയത്. സിനിമ വിജയിക്കുകയും 150 കോടിക്ക് മുകളില്‍ കളക്ഷന്‍ നേടുകയും ചെയ്തു. മുതല്‍മുടക്കും ലാഭവിഹിതവും പ്രകാരം 47 കോടി രൂപയാണ് പരാതിക്കാരന് ലഭിക്കേണ്ടത്. എന്നാല്‍ പ്രതികള്‍ അന്യായമായി ലാഭം കൈക്കലാക്കാന്‍ ഗൂഡാലോചന നടത്തി വഞ്ചിച്ചുവെന്നാണ് പരാതിയില്‍ പറയുന്നത്.

ഇന്ത്യന്‍ ബോക്‌സ് ഓഫീസില്‍ 150 കോടിയിലധികം രൂപയാണ് മഞ്ഞുമ്മല്‍ ബോയ്‌സ് സിനിമ നേടിയത്. ആഗോള തലത്തില്‍ 225 കോടി രൂപ സിനിമ സ്വന്തമാക്കി. കേരളത്തിനു പുറമേ തമിഴ്‌നാട്ടിലും സിനിമ ഹിറ്റായിരുന്നു.

ചിദംബരം രചനയും സംവിധാനവും നിര്‍വഹിച്ച സിനിമയില്‍ സൗബിന്‍ ഷാഹിര്‍, ശ്രീനാഥ് ഭാസി, ബാലു വര്‍ഗീസ്, ഗണപതി, ജീന്‍ പോള്‍ ലാല്‍, അഭിറാം രാധാകൃഷ്ണന്‍, ദീപക് പറമ്പോല്‍, ഖാലിദ് റഹ്‌മാന്‍, അരുണ്‍ കുര്യന്‍, വിഷ്ണു രഘു, ചന്തു തുടങ്ങിയവരാണ് മുഖ്യ കഥാപാത്രങ്ങളെ അവതരിപ്പിച്ചത്.