സംസ്ഥാനത്ത് തിരഞ്ഞെടുപ്പ് വിജ്ഞാപനം നാളെ, നാമനിർദ്ദേശ പത്രിക പിൻവലിക്കാൻ ഏപ്രിൽ എട്ട് വരെ സമയം, വോട്ടെടുപ്പ് അടുത്തമാസം 26ന്

തിരുവനന്തപുരം: കേരളം ഉൾപ്പെടെ 12 സംസ്ഥാനങ്ങളിൽ തിരഞ്ഞെടുപ്പ് വിജ്ഞാപനം നാളെ പുറപ്പെടുവിക്കും. ആകെ ഏഴ് ഘട്ടമായി നടക്കുന്ന തിരഞ്ഞെടുപ്പിന്റെ രണ്ടാം ഘട്ടത്തിലാണ് കേരളത്തിൽ വോട്ടെടുപ്പ് നടക്കുന്നത്. 20 മണ്ഡലങ്ങളിലും ഒറ്റ ഘട്ടമായാണ് സംസ്ഥാനത്ത് തിരഞ്ഞെടുപ്പ് നടക്കുക.

ഏപ്രില്‍ നാല് വരെ സംസ്ഥാനത്ത് പത്രിക സമര്‍പ്പിക്കാം. നാമനിര്‍ദ്ദേശ പത്രികകളുടെ സൂക്ഷ്മപരിശോധന അഞ്ചിന് നടക്കും. പത്രിക പിന്‍വലിക്കാന്‍ ഏപ്രില്‍ എട്ട് വരെ സമയമുണ്ട്. ഏപ്രിൽ 26നാണ് രണ്ടാം ഘട്ട തിരഞ്ഞെടുപ്പ്. ജമ്മു കശ്മീരിലും ഇതിനോടൊപ്പം വോട്ടെടുപ്പ് നടക്കും. ജൂൺ നാലിനാണു വോട്ടെണ്ണൽ. പ്രമുഖ രാഷ്ട്രീയ പാര്‍ട്ടികളുടെ സ്ഥാനാര്‍ത്ഥി പ്രഖ്യാപനം പൂര്‍ത്തിയായതോടെ കേരളത്തില്‍ തിരഞ്ഞെടുപ്പ് ചിത്രം വ്യക്തമായിക്കഴിഞ്ഞു. സ്ഥാനാര്‍ത്ഥികളും, നേതാക്കളും മണ്ഡലങ്ങളില്‍ പ്രചാരണവുമായി സജീവമാണ്.