2030 ഓടെ ആഗോളതലത്തിൽ ഇലക്ട്രിക് കാറുകൾ 10 ഇരട്ടി വർധിക്കും: ഇന്റർനാഷണൽ എനർജി ഏജൻസി

ന്യൂഡൽഹി: ആഗോളതലത്തിൽ 2030 ഓടെ ഇലക്ട്രിക് കാറുകളുടെ എണ്ണം നിലവിലുള്ളതിന്റെ പത്ത് മടങ്ങ് വർധിക്കുമെന്ന് ഇന്റർനാഷണൽ എനർജി ഏജൻസി (ഐ.ഇ.എ) പുറത്തിറക്കിയ റിപ്പോർട്ടിൽ പറയുന്നു. നിലവിൽ പെ​ട്രോൾ, ഡീസൽ എന്നിവയുടെ വൻ തോതിലുള്ള ഉപയോഗവും അവ പരിസ്ഥിതിക്കേൽപിക്കുന്ന ആഘാതവും പാരമ്പര്യ ഊർജ മേഖലകളിൽ നിന്നുള്ള മാറ്റത്തെകുറിച്ച് ചിന്തിക്കാൻ ശാസ്ത്രലോകത്തെ പ്രേരിപ്പിക്കുന്നു.

ഐ‌ഇ‌എയുടെ പുതിയ ‘വേൾഡ് എനർജി ഔട്ട്‌ലുക്ക് 2023’ കണക്കുകൾ പ്രകാരം, ആഗോള വൈദ്യുതി മിശ്രിതത്തിൽ പുനരുപയോഗിക്കാവുന്ന വസ്തുക്കളുടെ വിഹിതം നിലവിലെ 30 ശതമാനത്തിൽ നിന്ന് 2030 ഓടെ 50 ശതമാനത്തിലെത്തും.

“ശുദ്ധമായ ഊർജത്തിലേക്കുള്ള മാറ്റം ലോകമെമ്പാടും നടക്കുന്നുണ്ട്, അത് തടയാനാവില്ല. ഇത് ‘എത്ര പെട്ടെന്ന്’ എന്നതാണ് ചോദ്യം. എത്രയും വേഗമായാൽ നമുക്കെല്ലാവർക്കും നല്ലത്,” ഐഇഎ എക്‌സിക്യൂട്ടീവ് ഡയറക്ടർ ഫാത്തിഹ് ബിറോൾ പറഞ്ഞു.

2030 ഓടെ പുതിയ കൽക്കരി, വാതകം ഉപയോഗിച്ചുള്ള വൈദ്യുത നിലയങ്ങളിൽ കാറ്റാടി പദ്ധതികളിലെ നിക്ഷേപം മൂന്നിരട്ടി വർധിക്കും. ഊർജ്ജ ലോകം ഗണ്യമായി മാറുന്നതിന്റെ ഭാഗമായാണ് പുതിയ സാ​​ങ്കേതിക സന്നാഹങ്ങൾ രൂപപ്പെടുന്നത്. 2030ഓടെ ഊർജ്ജോത്പാദന ശേഷിയിലേക്ക് പുനരുപയോഗിക്കാവുന്നവയുടെ വിഹിതം 80 ശതമാനമായി വർധിക്കും.

“രാജ്യങ്ങൾ അവരുടെ ദേശീയ ഊർജ, കാലാവസ്ഥാ പ്രതിജ്ഞകൾ കൃത്യസമയത്തും പൂർണ്ണമായും നടപ്പാക്കുകയാണെങ്കിൽ, ശുദ്ധമായ ഊർജ്ജ പുരോഗതി കൂടുതൽ വേഗത്തിൽ നീങ്ങും. എന്നിരുന്നാലും, ആഗോളതാപനം 1.5 ഡിഗ്രി സെൽഷ്യസിലേക്ക് പരിമിതപ്പെടുത്തുക എന്ന ലക്ഷ്യം നിലനിർത്താൻ ഇനിയും ശക്തമായ നടപടികൾ ആവശ്യമാണ്,” റിപ്പോർട്ട് പരാമർശിച്ചു.

ആഗോള ഊർജ വിതരണത്തിലെ ഫോസിൽ ഇന്ധനങ്ങളുടെ പങ്ക് ഏകദേശം 80 ശതമാനത്തിൽ നിന്നും 2030 ഓടെ 73 ശതമാനമായി കുറയുമെന്നും റിപ്പോർട്ട് പറയുന്നു.