സ്കൂള്‍ ബസിന് നേരെ പാഞ്ഞടുത്ത് പടയപ്പ; കടന്നുപോയത് പരിഭ്രാന്തി സൃഷ്ടിച്ച് നിമിഷങ്ങള്‍

മൂന്നാറില്‍ സ്കൂള്‍ കുട്ടികളുമായി വന്ന ബസിന് നേരെ പടയപ്പ പാഞ്ഞടുത്തത് പരിഭ്രാന്തി പരത്തി. സ്കൂള്‍ ബസ് നീങ്ങുമ്പോള്‍ തൊട്ടുമുന്നില്‍ തിരിഞ്ഞുനില്‍ക്കുന്ന പടയപ്പയെയാണ് ദൃശ്യങ്ങള്‍ കാണുന്നത്. ബസ് അടുത്ത് എത്തിയപ്പോള്‍ ആന ബസിന് നേരെ പാഞ്ഞടുക്കുകയായിരുന്നു. വിദ്യാര്‍ത്ഥികള്‍ ഭയന്ന് കരയുന്ന ശബ്ദങ്ങളും കേള്‍ക്കാം.

ആന മുന്നോട്ട് വന്നതോടെ ഡ്രൈവര്‍ ബസ് പിറകിലേക്ക് എടുത്തു. ഇതോടെ റോഡിനു വിലങ്ങനെ ആന നിലയുറപ്പിച്ചു. ഒരു ബൈക്ക് യാത്രികനും ഈ സമയത്ത് അവിടെയുണ്ടായിരുന്നു. ഇയാളും ഭാഗ്യം കൊണ്ടാണ് രക്ഷപ്പെട്ടത്.

പടയപ്പയെ കണ്ട കുറ്റ്യാര്‍വാലി പ്രദേശത്ത് കുറെ നാളുകളായി ആനയുടെ സാന്നിധ്യമുണ്ട്. രണ്ടാഴ്ച മുന്‍പും ഇവിടെ പടയപ്പ ഭീതി വിതച്ചിരുന്നു. വനംവകുപ്പ് ഇവിടെ നിരീക്ഷണം ഏര്‍പ്പെടുത്തിയിട്ടുണ്ട്.