നടി കനകലത അന്തരിച്ചു; ഓര്‍മയായത് ഒട്ടനവധി കഥാപാത്രങ്ങളെ അനശ്വരയാക്കിയ പ്രിയ താരം; അവസാനകാലം രോഗങ്ങള്‍ മാത്രം കൂട്ട്; താണ്ടിയത് ദുരിതജീവിതം

തിരുവനന്തപുരം: പ്രമുഖ നടി കനകലത അന്തരിച്ചു. തിരുവനന്തപുരത്തെ വസതിയിലായിരുന്നു അന്ത്യം. പാര്‍ക്കിൻസൺ ഉള്‍പ്പെടെയുള്ള രോഗങ്ങള്‍ കാരണം ഏറെനാളായി ദുരിതാവസ്ഥയിലായിരുന്നു. പൂക്കാലം എന്ന ചിത്രത്തിലാണ് കനകലത അവസാനം പ്രത്യക്ഷപ്പെട്ടത്. ആരോഗ്യം മോശമായതുകൊണ്ട് സിനിമകളും സീരിയലും ഒഴിവാക്കിയിരുന്നു.

16 വർഷത്തെ ദാമ്പത്യത്തിനൊടുവിൽ വിവാഹമോചനം നേടി. കുട്ടികള്‍ ഉണ്ടായിരുന്നില്ല. നാടകത്തിലൂടെ സിനിമയിലെത്തിയ കനകലത മുന്നൂറ്റിയമ്പതോളം സിനിമകളിലും നിരവധി സീരിയലുകളിലും അഭിനയിച്ചിട്ടുണ്ട്. ഒരു യാത്രാമൊഴി, ഗുരു, കിലുകിൽ പമ്പരം, പാർവതീ പരിണയം, തുമ്പോളി കടപ്പുറം, ആദ്യത്തെ കൺമണി, എഫ്ഐആർ, ആകാശഗംഗ, അനിയത്തിപ്രാവ്, അഞ്ചരക്കല്യാണം, ദോസ്ത്, മയിൽപ്പീലിക്കാവ്, മന്ത്രമോതിരം, എന്നെന്നും നന്മകൾ, കൗരവർ, കിരീടം, ജാഗ്രത, രാജാവിന്റെ മകൻ തുടങ്ങിയവയാണ് പ്രധാനചിത്രങ്ങൾ.

താരങ്ങളുടെ സംഘടനയായ ‘അമ്മ’ യുടെ ഇന്‍ഷുറന്‍സും ആത്മയില്‍നിന്നും ചലച്ചിത്ര അക്കാദമിയില്‍നിന്നും ലഭിച്ച ധനസഹായവുമാണ് അവസാന കാലം തുണയായത്.

കൊല്ലം ജില്ലയിലെ ഓച്ചിറയില്‍ പരമേശ്വരന്‍ പിള്ളയുടേയും ചിന്നമ്മയുടേയും മകളായി 1960-ല്‍ ഓഗസ്റ്റ് 24-ന് ജനനം. കൊല്ലം സര്‍ക്കാര്‍ ഗേള്‍സ് ഹൈസ്‌കൂളില്‍ പ്രാഥമിക വിദ്യാഭ്യാസം. 1980-ല്‍ ഉണര്‍ത്തുപാട്ട് എന്ന സിനിമയിലാണ് ആദ്യമായി അഭിനയിച്ചത്. ആദ്യ ചിത്രം റിലീസായില്ല. തുടര്‍ന്ന് നാടകങ്ങളിലൂടെ നടിയെന്ന അംഗീകാരം നേടി.