ജയവിജയന്മാരിലെ കെ.ജി.ജയന്‍ വിട പറഞ്ഞു; സംഗീത പ്രതിഭയുടെ അന്ത്യം തൃപ്പൂണിത്തുറയിലെ വീട്ടില്‍; ഹിറ്റാക്കിയത് ‘നക്ഷത്രദീപങ്ങൾ തിളങ്ങി’ തുടങ്ങി ഒട്ടനവധി ഗാനങ്ങള്‍

കൊച്ചി: പ്രശസ്ത സം​ഗീതജ്ഞൻ കെ.ജി.ജയൻ (ജയവിജയ) (90) അന്തരിച്ചു. തൃപ്പൂണിത്തുറയിലെ വീട്ടിലായിരുന്നു അന്ത്യം. ചലച്ചിത്ര ​ഗാനങ്ങളിലൂടെയും ഭക്തി​ഗാനങ്ങളിലൂടെയും സം​ഗീതാസ്വാദകരുടെ മനംകവർന്നു. നടൻ മനോജ്.കെ.ജയൻ, ബിജു.കെ.ജയൻ എന്നിവരാണ് മക്കള്‍. ഇക്കഴിഞ്ഞ ഡിസംബറിലായിരുന്നു ജയന്‍ നവതി ആഘോഷിച്ചത്. 2019-ൽ രാജ്യം പദ്മശ്രീ നൽകി ആദരിച്ചു. 1991-ൽ സം​ഗീതനാടക അക്കാദമി, 2013-ൽ ഹരിവരാസനം പുരസ്കാരങ്ങൾ ലഭിച്ചിട്ടുണ്ട്.

കെ.ജി.ജയൻ, കെ.ജി.വിജയൻ ഇരട്ടസഹോദരന്മാരുടെ ‘ജയവിജയ’ കൂട്ടുകെട്ട് സംഗീത രംഗത്ത് പ്രശസ്തമായിരുന്നു. ഇരുപതോളം സിനിമകൾക്ക് ഇവര്‍ സം​ഗീത സംവിധാനം നിർവഹിച്ചു. 1988ല്‍ കെ.ജി.വിജയന്റെ വിയോ​ഗം അദ്ദേഹത്തിന് വലിയ ആഘാതമായിരുന്നു.

ഇഷ്ടദൈവമായ അയ്യപ്പസ്വാമിക്കു ഗാനാർച്ചന ഒരുക്കിയാണ് സംഗീതയാത്രയ്ക്കു തുടക്കമിട്ടത്. സന്നിധാനത്ത് നട തുറക്കുമ്പോൾ കേൾക്കുന്ന ‘ശ്രീകോവിൽ നടതുറന്നു’ എന്ന ഗാനം ഇവർ ഈണമിട്ട് ഇവര്‍ പാടിയതാണ്. 1968-ൽ പുറത്തിറങ്ങിയ ഭൂമിയിലെ മാലാഖമാർ ആണ് ആദ്യസിനിമ. ‘നക്ഷത്രദീപങ്ങൾ തിളങ്ങി…’, ‘ഹൃദയം ദേവാലയം…’ തുടങ്ങിയവ ഏറെ ഹിറ്റായി. യേശുദാസ് ആലപിച്ച് കെ.ജി. ജയൻ ഈണമിട്ട മയിൽപ്പീലി എന്ന കൃഷ്ണഭക്തി​ഗാന ആൽബം ഇന്നും ആസ്വാദകഹൃദയങ്ങളിലുണ്ട്. ഭാര്യ പരേതയായ സരോജിനി അധ്യാപികയായിരുന്നു.