ബിജെപി നേതാവിനെ വെടിവയ്ക്കുന്ന വീഡിയോ പുറത്ത്; ബംഗാള്‍ ബന്ദിൽ അക്രമം അഴിച്ചുവിട്ട് തൃണമൂൽ

കൊൽക്കത്തയിൽ വനിതാ ഡോക്ടർ ബലാത്സംഗത്തിന് ഇരയായി കൊല്ലപ്പെട്ട സംഭവത്തിൽ പ്രതിഷേധിച്ച് കഴിഞ്ഞ ദിവസം നടന്ന ബന്ദിൽ ബിജെപി നേതാക്കൾക്കെതിരെ വ്യാപക അക്രമം. ഭട്പാരയിൽ ബിജെപി നേതാവ് പ്രിയങ്ക പാണ്ഡെയുടെ കാറിനെ ലക്ഷ്യമാക്കി അഞ്ജാതൻ വെടിയുതിർക്കുന്നതിൻ്റെ വീഡിയോ ദൃശ്യങ്ങൾ പുറത്തുവിട്ടു. തനിക്ക് നേരെ തൃണമൂൽ കോൺഗ്രസ് പ്രവർത്തകർ വെടിവച്ചെന്നും ബോംബുകൾ എറിഞ്ഞെന്നും പ്രിയങ്കു പാണ്ഡെ ആരോപിച്ചു. ബിജെപി നേതാവ് അർജുൻ സിംഗിൻ്റെ വീട്ടിലേക്ക് പോകും വഴിയാണ് ആക്രമണമുണ്ടായത്. കാര്‍ തടഞ്ഞ് വാഹനത്തിന് നേരെ ബോംബുകൾ എറിയുകയും നിറയൊഴിക്കുകയും ആയിരുന്നു. വെടിയേറ്റ ഡ്രൈവറെ ആശുപത്രിയിൽ പ്രവേശിപ്പിച്ചിരിക്കുകയാണ്.

അക്രമികളെ കാക്കിനാരയിൽ നിന്ന് എത്തിച്ചതാണെന്ന് അർജുൻ സിംഗ് പറഞ്ഞു. തൃണമൂൽ നേതാക്കളായ തരുൺ സൗവും സോമനാഥ് ശ്യാം എംഎൽഎയുമാണ് പിന്നിലെന്നും അദ്ദേഹം കൂട്ടിച്ചേർത്തു. ഇങ്ങനെയാണ് മമതാ ബാനർജി പ്രതിഷേധങ്ങളെ ഇല്ലാതാക്കാൻ ശ്രമിക്കുന്നതെന്ന് വീഡിയോ സോഷ്യൽ മീഡിയയിൽ പങ്കുവച്ചുകൊണ്ട് ബിജെപി നേതാവ് സുവേന്ദു അധികാരി കുറിച്ചു. ബിജെപി എംപി ജയന്ത കുമാര്‍ റോയിയുടെ കാറും കഴിഞ്ഞ ദിവസം ഭരണകക്ഷി പ്രവര്‍ത്തകര്‍ ആക്രമിച്ചിരുന്നു. കാറിന് നേരെ കല്ലേറും ഉണ്ടായി.

ഓഗസ്റ്റ് 9ന് ആർജി കർ സർക്കാർ മെഡിക്കൽ കോളേജിൽ പിജി വിദ്യാർത്ഥിനിയായ ഡോക്ടർ ബലാത്സംഗത്തിന് ഇരയായി കൊല്ലപ്പെട്ട സംഭവത്തിൽ മമത സർക്കാർ രാജിവയ്ക്കണമെന്ന് ആവശ്യപ്പെട്ട് ബിജെപിയാണ് ഹർത്താലിന് ആഹ്വാനം ചെയ്തത്. ആശുപത്രിയിലെ സെമിനാർ ഹാളിലാണ് ഡ്യൂട്ടിയിലുണ്ടായിരുന്ന ഡോക്ടറുടെ മൃതദേഹം കണ്ടെത്തിയത്. പോസ്റ്റുമോർട്ടത്തിൽ ലൈംഗികാതിക്രമം നടന്നതായി തെളിഞ്ഞിരുന്നു.

തല, കവിളുകൾ, ചുണ്ട്, മൂക്ക്, താടി, കഴുത്ത്, ഇടത് കൈ, തോള്‍, കാൽ മുട്ട്, കണങ്കാൽ, സ്വകാര്യ ഭാഗങ്ങൾ എന്നിവിടങ്ങളിലായി 25 മുറിവുകളാണ് ഇരയുടെ ശരീരത്തിൽ കണ്ടെത്തിയത്. ഓഗസ്റ്റ് 10ന് സിവിക് പോലീസ് വോളണ്ടിയറായ സഞ്ജയ് റോയിയെ സംഭവത്തിൽ പോലീസ് അറസ്റ്റ് ചെയ്തിരുന്നു. ആദ്യം കേസ് അന്വേഷിച്ച സംസ്ഥാന പോലീസ് കേസ് അട്ടിമറിക്കാൻ ശ്രമിച്ചെന്ന് സിബിഐ സുപ്രീം കോടതിയിൽ ആരോപിച്ചിരുന്നു. തുടർന്ന് തൃണമൂൽ സർക്കാരിനെതിരെയുള്ള പ്രതിഷേധം ശക്തമാക്കുന്നതിൻ്റെ ഭാഗമായിട്ടാണ് കഴിഞ്ഞ ദിവസം ബിജെപി ബന്ദിന് ആഹ്വാനം ചെയ്തത്.