ബസുകളിൽ സൗജന്യയാത്ര; ആനുകൂല്യം അതിദരിദ്ര കുടുംബങ്ങളിലെ കുട്ടികൾക്ക് നവംബർ ഒന്ന് മുതൽ

തിരുവനന്തപുരം: അതിദരിദ്ര കുടുംബങ്ങളിലെ കുട്ടികൾക്ക് കെഎസ്ആർടിസിയിലും സ്വകാര്യ ബസുകളിലും നവംബർ ഒന്നുമുതൽ സൗജന്യമായി യാത്ര ചെയ്യാം. ഇത് സംബന്ധിച്ച് ​ഗതാ​ഗത വകുപ്പ് ഉത്തരവിറക്കി. വിദ്യാഭ്യാസ ആവശ്യങ്ങൾക്ക് മാത്രമാണ് സൗജന്യ യാത്ര അനുവദിക്കുന്നത്. സംസ്ഥാന സർക്കാരിന്റെ അതിദരിദ്ര നിർമാർജന പദ്ധതിയുടെ ഭാഗമായാണ് തീരുമാനം.

ഉത്തരവ് പ്രാബല്യത്തിൽ വരുന്നതോടെ സംസ്ഥാനത്തെ അതിദരിദ്രരെന്ന് കണ്ടെത്തിയ 64,000 കുടുംബങ്ങളിലെ വിദ്യാർഥികളുടെ യാത്ര പൂർണമായും സൗജന്യമാകും. റേഷൻ കാർഡുകൾ തരംമാറ്റാനുള്ള അപേക്ഷകളിൽ ബാക്കിയുള്ളവ ഉടൻ പൂർത്തിയാക്കാൻ നിർദേശം നൽകിയിട്ടുണ്ട്. അതിദരിദ്ര്യ ലിസ്റ്റില്‍പ്പെട്ട സങ്കേതികതടസ്സമില്ലാത്ത മുഴുവൻ പേർക്കും അവകാശ രേഖകളും ഇതിനോടകം നൽകി. നിലവിൽ ഹയർ സെക്കൻഡറി വരെ മുഴുവൻ വിദ്യാർത്ഥികൾക്കും കെഎസ്ആർടിസി ബസുകളിൽ സൗജന്യ യാത്രയാണ്. കോളേജ് തലത്തിലുള്ള വിദ്യാർഥികൾക്ക് നിലവിൽ കൺസഷൻ നിരക്കാണുള്ളത്.