കേരളത്തിന്റെ മകളെ തിരിച്ചുകിട്ടി; കണ്ടെത്തിയത് കൊല്ലത്ത് ഉപേക്ഷിക്കപ്പെട്ട നിലയിൽ

കൊല്ലം: ഓയൂരിൽ നിന്ന് കാണാതായ ആറു വയസുകാരിയെ കണ്ടെത്തി. കൊല്ലം ആശ്രാമം മൈതാനത്ത് നിന്നാണ് കുട്ടിയെ കിട്ടിയത്. തട്ടിക്കൊണ്ടു പോയ സംഘം ഉപേക്ഷിച്ചു പോയ നിലയിലാണ് കണ്ടെത്തിയത്. ഇന്നലെ വൈകിട്ട് നാല് മണിയോടെ പൂയപ്പള്ളി കാറ്റാടിമുക്കിൽ വച്ചാണ് റെജിയുടെ മകൾ അബിഗേൽ സാറ റെജിയെ കാറിൽ എത്തിയ സംഘം തട്ടിക്കൊണ്ടു പോയത്. മാതാപിതാക്കൾ ഒപ്പമില്ലാതെ ഒരു കുട്ടി ഒറ്റക്ക് ഇരിക്കുന്നത് കണ്ട നാട്ടുക്കാരാണ് പോലീസിനെ വിവരം അറിയിച്ചത്.

20 മണിക്കൂറായി പോലീസ് കുട്ടിക്ക് വേണ്ടി തിരച്ചിൽ തുടങ്ങിയിട്ട്. സഹോദരനൊപ്പം ട്യൂഷനു പോയ കുട്ടിയെയാണ് തട്ടിക്കൊണ്ടു പോയത്. അഞ്ച് ലക്ഷം രൂപ മോചനദ്രവ്യം ആവശ്യപ്പെട്ട് കുട്ടിയുടെ അമ്മക്ക് ഫോണ്‍ സന്ദേശം ലഭിച്ചിരുന്നു. സിസിടിവി ദൃശ്യങ്ങളും ഫോൺ നമ്പറും കേന്ദ്രികരിച്ച് പോലീസ് അന്വേഷണം ഊർജിതമാക്കിയിരുന്നു. പ്രതിയെന്ന് സംശയിക്കുന്ന ഒരാളുടെ രേഖ ചിത്രവും പോലീസ് പുറത്തുവിട്ടിരുന്നു.