കൊടുവളളിയില്‍ വ്യാപാരിയെ ആക്രമിച്ച് 2 കിലോ സ്വര്‍ണം കവര്‍ന്നു; കാറിടിച്ച് വീഴ്ത്തി കത്തി കാട്ടി ഭീഷണിപ്പെടുത്തി

കോഴിക്കോട് കൊടുവള്ളിയില്‍ സ്വര്‍ണവ്യാപാരിയെ കാറിടിച്ച് വീഴ്ത്തി കവര്‍ച്ച. രണ്ട് കിലോ സ്വര്‍ണ്ണമാണ് കവര്‍ന്നത്. മുത്തമ്പലം സ്വദേശി ബൈജുവിനെയാണ് ഒരു സംഘം ആക്രമിച്ചത്. ഇന്നലെ രാത്രിയില്‍ ബൈക്കില്‍ സഞ്ചരിക്കുകയായിരുന്ന ബൈജുവിനെ പിന്‍തുടര്‍ന്ന് എത്തിയ ഒരു സംഘം ആക്രമിക്കുകയായിരുന്നു.

കൊടുവള്ളി- ഓമശ്ശേരി റോഡില്‍ മുത്തമ്പലത്താണ് സംഭവം. ബൈക്കില്‍ കാറിടിച്ച് വീഴ്ത്തിയ ശേഷം കത്തി കാട്ടി ഭീഷണിപ്പെടുത്തിയാണ് കവര്‍ച്ച നടത്തിയത്. വെള്ളക്കാറിലാണ് മോഷ്ടാക്കള്‍ എത്തിയതെന്ന് ബൈജു പോലീസില്‍ നല്‍കിയ പരാതിയില്‍ പറയുന്നത്. അഞ്ചുപേരാണ് സംഘത്തില്‍ ഉണ്ടായിരുന്നതെന്നും പരാതിയില്‍ പറയുന്നുണ്ട്. സ്വര്‍ണാഭരണങ്ങള്‍ നിര്‍മിക്കുന്ന സ്ഥാപനം നടത്തുന്ന ആളാണ് ബൈജു. അതുകൊണ്ട് തന്നെ സ്വര്‍ണം കൈയ്യില്‍ ഉണ്ടെന്ന് ഉറപ്പിച്ചാണ് ആക്രമണം നടത്തിയതെന്നാണ് പോലീസ് നിഗമനം. അന്വേഷണം ആരംഭിച്ചിട്ടുണ്ട്.