ഗുണ്ടകളെ പൂട്ടാന്‍ ഓപ്പറേഷന്‍ ‘ആഗു’മായി പോലീസ്; നടപടി കടുപ്പിക്കുന്നത് ഗുണ്ടാ ആക്രമണങ്ങള്‍ പതിവായതോടെ; വ്യാപകമായി റെയ്ഡ്; കാപ്പ പ്രതികളുടെ വീട്ടിലും പരിശോധന

തിരുവനന്തപുരം: ഗുണ്ടകള്‍ക്കെതിരെ നടപടിയുമായി പോലീസ്. ഓപ്പറേഷൻ ആഗ് എന്ന പേരിൽ കേരളമൊട്ടാകെ പൊലീസ് റെയ്ഡ് നടക്കുകയാണ്. ഇന്ന് രാവിലെ 6 മണി മുതലാണ് റെയ്ഡ് ആരംഭിച്ചത്. തിരുവനന്തപുരത്ത് കരമന, നേമം മേഖലയിലാണ് പരിശോധന നടക്കുന്നത്.

കഴിഞ്ഞ ദിവസങ്ങളിൽ തുടർച്ചയായിനടന്ന ഗുണ്ടാ ആക്രമണങ്ങൾ ചര്‍ച്ചയായതോടെയാണ് നടപടി പോലീസ് കടുപ്പിക്കുന്നത്. കാപ്പ ചുമത്തപ്പെട്ട പ്രതികളുടെ വീടുകളിലും റെയ്ഡ് നടക്കുന്നുണ്ട്.

കരമനയിലെ അഖില്‍ വധത്തില്‍ പ്രതികളെ 3 ദിവസങ്ങൾക്കു ശേഷമാണു പിടികൂടുന്നത്. സംഭവം മാധ്യമങ്ങളിലടക്കം ചർച്ചാവിഷയമായതോടെയാണു പൊലീസ് ഇടപെടുകയും അടിയന്തര നടപടികളിലേക്കു കടക്കുകയും ചെയ്തിരിക്കുന്നത്. ഇന്നലെ രാത്രി വെള്ളറടയിൽ വീണ്ടും ലഹരിമാഫിയയുടെ ആക്രമണം ഉണ്ടായിരുന്നു.