ക്യാമ്പിലെ കുടുംബങ്ങള്‍ക്ക് പതിനായിരം; ജീവനോപാധി ഇല്ലാത്തവര്‍ക്ക് പ്രതിദിനം 300 രൂപ; വയനാട് ദുരന്തത്തില്‍ ധനസഹായം
വയനാട് ജില്ലയിലെ മുണ്ടക്കൈ, ചൂരല്‍മല പ്രദേശത്ത് ഉരുള്‍പൊട്ടല്‍ ദുരന്തത്തിന് ഇരയാവർക്ക് ധനസഹായം പ്രഖ്യാപിച്ച് സര്‍ക്കാര്‍. ദുരന്തത്തില്‍ എല്ലാം നഷ്ടപ്പെട്ടവര്‍ക്ക് മറ്റൊരു വാസസ്ഥലത്തേക്ക് മാറുന്നതിന് സംസ്ഥാന സര്‍ക്കാര്‍ സഹായം നല്‍കും. ഇതുകൂടാതെയാണ് അടിയന്തര ധനസഹായം അനുവദിച്ചിരിക്കുന്നത്.
ജീവനോപാധി നഷ്ടപ്പെട്ട പ്രായപൂര്‍ത്തിയായ ഒരു വ്യക്തിക്ക് 300 രൂപ വീതം ദിവസവും നല്‍കും. ഒരു കുടുംബത്തിലെ രണ്ട് വ്യക്തികള്‍ക്കാകും ഈ ആനുകൂല്യം ലഭ്യമാവുക. കിടപ്പുരോഗികളോ ആശുപത്രിയില്‍ ദീര്‍ഘനാള്‍ ചികിത്സയില്‍ കഴിയുന്ന രോഗികളോ ഉള്ള കുടുംബങ്ങള്‍ക്ക് ഈ ആനുകൂല്യം മൂന്ന് പേര്‍ക്കുവരെ ലഭിക്കും. 30 ദിവസത്തേക്കാണ് ഈ തുക നല്‍കുക.
ഇപ്പോള്‍ ക്യാമ്പില്‍ കഴിയുന്ന ഓരോ കുടുംബത്തിനും അടിയന്തര ധനസഹായമായി പതിനായിരം രൂപ വീതം അനുവദിക്കും. ഇവരെ ക്യാമ്പില്‍ നിന്നും സര്‍ക്കാര്‍ ഉടമസ്ഥതയിലോ മറ്റു പൊതു ഉടമസ്ഥതയിലോ ഉള്ള സ്ഥലങ്ങളില്‍ താമസ സൗകര്യം ഒരുക്കാനാകുമോ എന്നതില്‍ കളക്ടറുടെ റിപ്പോര്‍ട്ട് സര്‍ക്കാര്‍ ആവശ്യപെട്ടിട്ടുണ്ട്. കളക്ടറുടെ റിപ്പോര്‍ട്ട് ലഭിച്ച ശേഷമാകും ഇവയുടെ വാടക നിശ്ചയിച്ച് അനുവദിക്കുക.
കേരളം ചർച്ച ചെയ്യാനിരിക്കുന്ന വലിയ വാർത്തകൾ ആദ്യം അറിയാൻ മാധ്യമ സിൻഡിക്കറ്റ് വാട്സ്ആപ്പ് ഗ്രൂപ്പിൽ ജോയിൻ ചെയ്യാം
Click here
