അമീബിക്ക് മസ്തിഷ്ക ജ്വരം ബാധിച്ച കുട്ടിക്ക് വിദേശത്ത് നിന്ന് മരുന്ന് എത്തിക്കാൻ ശ്രമം; സാധ്യമായ എല്ലാ ചികിത്സയും നല്‍കുമെന്ന് ആരോഗ്യ മന്ത്രി

തിരുവനന്തപുരം: അമീബിക്ക് മസ്തിഷ്ക ജ്വരം (അമീബിക് മെനിഞ്ചോ എന്‍സെഫലൈറ്റിസ്) ബാധിച്ച് കോഴിക്കോട് മെഡിക്കല്‍ കോളജിൽ ചികിത്സയിലുള്ള അഞ്ചു വയസ്സുകാരന് വിദേശത്തുനിന്ന് മരുന്ന് എത്തിക്കുന്നതിനുള്ള സാധ്യതകൾ പരിശോധിച്ച് സർക്കാർ. കുട്ടിയ്ക്ക് സാധ്യമായ എല്ലാ വിദഗ്ധ ചികിത്സയും നല്‍കുമെന്ന് ആരോഗ്യ മന്ത്രി വീണ ജോര്‍ജ് അറിയിച്ചു. ഈ രോഗത്തിന് ഫലപ്രദമായ മരുന്നുകളില്ല. നേഗ്ലെറിയയ്‌ക്കെതിരെ ഫലപ്രദമെന്ന് കരുതുന്ന ഒരു കൂട്ടം മരുന്നുകളുടെ സംയുക്തം ഉപയോഗിച്ചാണ് ചികിത്സിക്കുന്നത്. മരുന്ന് ലഭ്യമല്ലെന്ന് കുട്ടിയുടെ ബന്ധുക്കൾ പരാതി ഉന്നയിച്ചിരുന്നു. ഇതേത്തുടർന്നാണ് സർക്കാർ അടിയന്തരമായി ഇടപെടുന്നത്.

രോഗം റിപ്പോര്‍ട്ട് ചെയ്ത പ്രദേശത്ത് ആരോഗ്യ വകുപ്പ് പ്രതിരോധ പ്രവര്‍ത്തനങ്ങള്‍ ഊര്‍ജിതമാക്കി. ആര്‍ക്കെങ്കിലും രോഗലക്ഷണങ്ങള്‍ കണ്ടാല്‍ വിദഗ്ധ ചികിത്സ ഉറപ്പാക്കാനും ജില്ലാ മെഡിക്കല്‍ ഓഫീസര്‍ക്ക് നിര്‍ദേശം നല്‍കിയിട്ടുണ്ട്.

മലപ്പുറം മൂന്നിയൂര്‍ പഞ്ചായത്തിലെ 5 വയസുകാരനാണ് രോഗം സ്ഥിരീകരിച്ചത്. ഈ മാസം ഒന്നാം തീയതി കുട്ടി ബന്ധുക്കളോടോപ്പം വീടിന് സമീപത്തെ കടലുണ്ടി പുഴയില്‍ കുളിച്ചിരുന്നു. പത്താം തീയതി പനിയും തലവേദനയും ഛര്‍ദിയും ഉണ്ടായതിനെ സ്വകാര്യ ആസ്പത്രിയിൽ ചികിത്സ തേടി. രോഗം മൂർച്ഛിച്ചതിനെ തുടർന്നാണ് മെഡിക്കല്‍ കോളേജില്‍ പ്രവേശിപ്പിച്ചത്.