ഗ്രീഷ്മയുടെ ക്രൂരതയ്ക്ക് ശിക്ഷ ഇന്ന്; പ്രതിയെ ഉടന്‍ കോടതിയില്‍ എത്തിക്കും

പാറശാല ഷാരോണ്‍രാജ് വധക്കേസില്‍ ശിക്ഷ ഇന്ന്. കാമുകനെ ഒഴിവാക്കാന്‍ കഷായത്തില്‍ കീടനാശിന് കലര്‍ത്തി നല്‍കി കൊലപ്പെടുത്തി എന്നാണ് കേസ്. ഒന്നാംപ്രതി ഗ്രീഷ്മ, മൂന്നാം പ്രതി ഗ്രീഷ്മയുടെ അമ്മാവന്‍ നിര്‍മല കുമാരന്‍ നായര്‍ എന്നിവരുടെ ശിക്ഷയാണ് രാവിലെ 11-ന് നെയ്യാറ്റിന്‍കര സെഷന്‍സ് കോടതിയാണ് വിധിക്കുക.

പ്രോസിക്യൂഷന്റേയും പ്രതിഭാഗത്തിന്റേയും അന്തിമവാദം പൂര്‍ത്തിയായിരുന്നു. പ്രതിക്ക് വധശിക്ഷ നല്‍കണമെന്ന ആവശ്യമാണ് പ്രോസിക്യൂഷന്‍ മുന്നോട്ടു വച്ചിരിക്കുന്നത്. സ്‌നേഹമെന്ന വികാരത്തെയാണ് പ്രതി കൊലപ്പെടുത്തിയത്. പ്രതിക്ക് ചെകുത്താന്റെ സ്വഭാവമാണ്. സ്നേഹം നടിച്ച് വീട്ടിലേക്ക് വിളിച്ചുവരുത്തിയാണ് കൊലപാതകം നടത്തിയത്.കേസ് അപൂര്‍വങ്ങളില്‍ അപൂര്‍വമാണെന്നും അന്തിമവാദത്തില്‍ പ്രോസിക്യൂഷന്‍ കോടതിയില്‍ വാദിച്ചിരുന്നു.

തുടര്‍ പഠനം പ്രായം തുടങ്ങിയവ പരിഗണിക്കണമെന്നായിരുന്നു പ്രതിഭാഗത്തിന്റെ വാദം. കിടപ്പറ ദൃശ്യം പകര്‍ത്തി ഷാരോണ്‍ ഭീഷണിപ്പെടുത്തി. ബന്ധത്തില്‍ നിന്നും പിന്‍മാറണമെന്ന് ആവശ്യപ്പെട്ടിട്ടും തയാറായില്ല. തുടങ്ങിയ കാര്യങ്ങളാണ് പ്രതിഭാഗം കോടതിയുടെ മുന്നില്‍ വച്ചിരിക്കുന്നത്.

2022 ഒക്ടോബര്‍ 14 നാണ് ഷാരോണ്‍ രാജിനെ ഗ്രീഷ്മ വിഷം കലര്‍ത്തിയ കഷായം നല്‍കിയത്. ആശുപത്രിയില്‍ ചികിത്സയിലിരിക്കെ ഒക്ടോബര്‍ 25-നാണ് ഷാരോണ്‍രാജ് മരിച്ചത്. സൈനികനുമായി വിവാഹം ഉറപ്പിച്ചതോടെയാണ് ഷാരോണിനെ ഒഴിവാക്കാന്‍ ഗ്രീഷ്മ നീക്കം നടത്തിയത്.
വിവാഹം ഉറപ്പിച്ചതിന് ശേഷം ഷാരോണിന്റെ വീട്ടില്‍വെച്ച് ഇരുവരും താലികെട്ടി. പിന്നീട് വെട്ടുകാട് പള്ളിയില്‍ വെച്ചും താലികെട്ടി. തൃപ്പരപ്പിലുള്ള ഹോട്ടലില്‍ മുറിയെടുത്ത് ഇരുവരും ശാരീരികബന്ധത്തില്‍ ഏര്‍പ്പെട്ടതായും കുറ്റപത്രത്തില്‍ പറയുന്നു. കേസില്‍ തെളിവുകളുടെ അഭാവത്തില്‍ രണ്ടാം പ്രതിയായ ഗ്രീഷ്മയുടെ അമ്മ സിന്ധുവിനെ വെറുതെ വിട്ടിരുന്നു.