മകൻ പ്രതിയായ കേസിൽ വീട്ടുകാരെ ബുദ്ധിമുട്ടിക്കരുതെന്ന് മനുഷ്യാവകാശ കമ്മീഷൻ; ഇടപെടൽ പ്രതിയുടെ അമ്മയുടെ പരാതിയിൽ

മകൻ കഞ്ചാവ് കേസിൽ പ്രതിയായതിൻ്റെ പേരിൽ വീട്ടിലുള്ളവരെ അനാവശ്യമായി ബുദ്ധിമുട്ടിക്കരുതെന്ന് പോലീസിനോട് സംസ്ഥാന മനുഷ്യാവകാശ കമ്മീഷൻ. 2023 ജൂലൈ 15ന് തിരുവനന്തപുരം വട്ടപ്പാറ സ്റ്റേഷൻ ഹൗസ് ഓഫീസറും സംഘവും വീട്ടിൽ അതിക്രമിച്ച് കയറി പരാതിക്കാരിയെ ദേഹോപദ്രവം ഏൽപ്പിച്ചു എന്ന പരാതിയിലാണ് കമ്മിഷൻ്റെ ഇടപെടൽ.

പരാതിയുടെ അടിസ്ഥാനത്തിൽ തിരുവനന്തപുരം റൂറൽ ജില്ലാ പോലീസ് മേധാവിയിൽ നിന്ന് കമ്മീഷൻ റിപ്പോർട്ട് വാങ്ങി. പരാതിക്കാരിയുടെ മകനെതിരെ 1057/23 എന്ന ക്രൈം നമ്പറിൽ കേസുണ്ടെന്നും പ്രതിക്ക് കഞ്ചാവ് കച്ചവടവുമായി ബന്ധമുണ്ടെന്ന വിശ്വാസയോഗ്യമായ അറിവിന്റെ അടിസ്ഥാനത്തിൽ പോലീസ് വീട്ടിൽ നിയമപ്രകാരം പരിശോധന നടത്തിയെന്നും എസ്പിയുടെ റിപ്പോർട്ടിൽ പറയുന്നു.

പരാതിക്കാരിയുടെ മകൻ പ്രതിയായ കേസിൽ നിയമപരമായ മാർഗത്തിലൂടെ പരിഹാരം കാണണമെന്ന് കമ്മിഷൻ ചെയർമാൻ ജസ്റ്റിസ് അലക്സാണ്ടർ തോമസ് ഉത്തരവിൽ പറഞ്ഞു. കേസിന്റെ അന്വേഷണത്തിൽ പരാതിയുണ്ടെങ്കിൽ പരാതിക്കാരിക്ക് ജില്ലാ പോലീസ് മേധാവി മുൻപാകെ പരാതി നൽകാമെന്നും ഉത്തരവിൽ പറഞ്ഞു.