നിളയുടെ കഥാകാരന് രാജ്യത്തിൻ്റെ ആദരം; മരണാനന്തര ബഹുമതിയായി എംടിക്ക് പത്മവിഭൂഷൺ

അന്തരിച്ച മലയാളത്തിൻ്റെ പ്രിയ കഥാകാരൻ എംടി വാസുദേവൻ നായര്‍ക്ക് രാജ്യത്തിന്‍റെ ആദരം. മരണാനന്തര ബഹുമതിയായി എംടിക്ക് പത്മവിഭൂഷണ്‍ സമ്മാനിക്കും. മുമ്പ് പത്മഭൂഷണ്‍ പുരസ്‌കാരവും (2005) ജ്ഞാനപീഠവും (1995) നല്‍കി രാജ്യം ആദരിച്ചിട്ടുള്ള എംടി കഴിഞ്ഞ മാസം25നാണ് അന്തരിച്ചത്.

പ്രശസ്ത ഹൃദ്രോഗ വിദഗ്ധന്‍ ജോസ് ചാക്കോ പെരിയപുറം, ഇന്ത്യൻ ഹോക്കി താരം ഒളിമ്പ്യൻ പിആര്‍ ശ്രീജേഷ്, നടി ശോഭന, നടൻ അജിത്ത്, ഉള്‍പ്പെടെയുള്ളവര്‍ക്ക് പത്മഭൂഷണും സമ്മാനിക്കും. മുൻ ഫുട്ബോൾതാരം ഐഎം വിജയൻ, പ്രശസ്ത സംഗീതജ്ഞ കെ ഓമനക്കുട്ടിയമ്മ, ക്രിക്കറ്റ് താരം ആര്‍ അശ്വിൻ തുടങ്ങിയവര്‍ക്ക് പത്മശ്രീ പുരസ്കാരവും സമ്മാനിക്കും

തെലുങ്ക് നടൻ ബാലകൃഷ്ണയും പത്മഭൂഷണ്‍ പുരസ്ക്കാരത്തിന് അർഹനായി. സുപ്രീം കോടതി അഭിഭാഷകൻ സിഎസ് വൈദ്യനാഥൻ, ഗായകൻ അര്‍ജിത്ത് സിങ്, മൃദംഗ വിദ്വാൻ ഗുരുവായൂര്‍ ദൊരൈ എന്നിവർക്കും പത്മശ്രീ പുരസ്കാരം സമ്മാനിക്കും.

അന്തരിച്ച ബിജെപി നേതാവ് സുശീൽ കുമാര്‍ മോദിക്കും ഗായകൻ പങ്കജ് ഉദ്ദാസിന് മരണാനന്തര ബഹുമതിയായി പത്മഭൂഷണ്‍ നൽകും. ആകെ ഏഴു പേര്‍ക്കാണ് പത്മവിഭൂഷണ്‍ പ്രഖ്യാപിച്ചത്. 19 പേര്‍ പത്മഭൂഷണും 113 പേര്‍ പത്മശ്രീ പുരസ്കാരത്തിനും അര്‍ഹരായി.