ഡ്രൈവർ എന്ന വ്യാജേനെ മൂന്ന് യുവതികളെ ബലാത്സംഗം ചെയ്ത യുവാവിനെ ഭാഷ കുടുക്കി; 22കാരൻ അറസ്റ്റിൽ

മൂന്ന് സ്ത്രീകളെ ലൈംഗികമായി പീഡിപ്പിച്ച ഇന്ത്യൻ വംശജൻ കാനഡയിൽ പിടിയിൽ. ബ്രാംപ്ടണിൽ നിന്നുള്ള 22 കാരനായ അർഷ്ദീപാണ് പിടിയിലായത്. നവംബർ മാസത്തിലാണ് ഇയാൾ മൂന്ന് സ്ത്രീകളെ ബലാത്സംഗം ചെയ്തത്. പ്രതിയെ പിടികൂടാൻ സഹായിച്ചത് അതിക്രമ സമയത്ത് ഉപയോഗിച്ച ഭാഷ പഞ്ചാബി ഭാഷയാണെന്ന് പീൽ പോലീസ് പറഞ്ഞു. മൂന്ന് ഇരകളോടും പ്രതി പഞ്ചാബിലാണ് സംസാരിച്ചിരുന്നത്. തുടർന്ന് പഞ്ചാബി സംസാരിക്കുന്ന ആളുകളെ കേന്ദ്രീകരിച്ച് പോലീസ് അന്വേഷണം നടത്തുകയായിരുന്നു.

റൈഡ് ഷെയർ ഡ്രൈവറെന്ന വ്യാജേനെയാണ് പ്രതി ഇരകളെ തെറ്റിദ്ധരിപ്പിച്ച് പീഡിപ്പിച്ചത്. ഈ മാസം എട്ട്, 16 തീയതികളിൽ ബ്രാംപ്ടൺ, വോഗൻ എന്നീ പ്രദേശങ്ങളിൽ വച്ചാണ് മൂന്ന് ലൈംഗികാതിക്രമങ്ങളും നടന്നത്. സംഭവ ശേഷം ഇരകൾ പീൽ പോലീസിന് പരാതി നൽകിയിരുന്നു. മൂന്ന് സംഭവങ്ങളും വിശദമായി പരിശോധിച്ച അധികൃതർ ഒരാളാണ് പ്രതിയെന്ന നിഗമനത്തിൽ എത്തുകയായിരുന്നു. ബലാത്സംഗ സമയത്ത് പഞ്ചാബി ഭാഷ ഉപയോഗിച്ചത് പിന്നീട് പ്രതിയെ കണ്ടെത്താൻ സഹായകരമായെന്ന് പീൽ പോലീസ് പറഞ്ഞു.

നവംബർ എട്ടിന് ബ്രാംപ്റ്റണിൽ ഒരു മണിക്കൂറിന് ഇടയിൽ വച്ചാണ് അർഷദ്വീപ് രണ്ട് പീഡനങ്ങൾ നടത്തിയത്. ബസ് കാത്തുനിന്ന യുവതികളാണ് പീഡനത്തിന് ഇരയായത്. വാഹനങ്ങളിൽ കയറ്റിയ ശേഷം കിലോമീറ്ററുകൾ ദൂരേക്ക് കൊണ്ടുപോയി വിജനമായ സ്ഥലത്ത് വച്ചായിരുന്നു ബലാത്സംഗം ചെയ്തത്. പുതിയ കാർ ഓടിക്കാൻ നൽകാം എന്ന് വാഗ്ദാനം നൽകിയായിരുന്നു മൂന്നാം പീഡനം. അർഷ്ദീപ് സിംഗിനെതിരെ തട്ടിക്കൊണ്ടുപോകൽ, ബലാത്സംഗം,കവർച്ച, ഭീഷണിപ്പെടുത്തൽ എന്നീ കുറ്റങ്ങളാണ് ചുമത്തിയിരിക്കുന്നത്.