ടെസ്റ്റ് ബൗളിങ് റാങ്കിങ്ങില്‍ ഒന്നാമനായി ജസ്പ്രീത് ബുംറ; ഈ നേട്ടം സ്വന്തമാക്കുന്ന ആദ്യ ഇന്ത്യക്കാരന്‍

ഐസിസിയുടെ ഏറ്റവും പുതിയ പുരുഷ ടെസ്റ്റ് ബൗളര്‍ റാങ്കിങ്ങില്‍ ഒന്നാം സ്ഥാനത്തെത്തുന്ന ആദ്യ ഇന്ത്യന്‍ പേസ് ബൗളറായി ജസ്പ്രീത് ബുംറ. ഇംഗ്ലണ്ടിനെതിരായ ടെസ്റ്റ് പരമ്പരയിലെ മികച്ച പ്രകടനമാണ് ബുംറയെ ഒന്നാം സ്ഥാനത്തെത്തിച്ചത്. രവിചന്ദ്ര അശ്വിന്‍, രവീന്ദ്ര ജഡേജ, ബിഷന്‍ ബേദി എന്നിവരാണ് മുമ്പ് ടെസ്റ്റില്‍ ഒന്നാം സ്ഥാനത്തെത്തിയ മറ്റു ഇന്ത്യന്‍ ബൗളര്‍മാര്‍.

ഹൈദരാബാദില്‍ നടന്ന പരമ്പരയിലെ ആദ്യ ടെസ്റ്റില്‍ ആറ് വിക്കറ്റ് വീഴ്ത്തിയ ബുംറ വിശാഖപ്പട്ടണത്ത് നടന്ന രണ്ടാം ടെസ്റ്റില്‍ ഒമ്പത് വിക്കറ്റുകള്‍ നേടിയിരുന്നു. രണ്ടാം ടെസ്റ്റില്‍ ഇന്ത്യയെ വിജയത്തിലേക്ക് കൈപിടിച്ചെത്തിച്ച ബുംറ തന്നെയായിരുന്ന കളിയിലെ താരവും.

വിശാഖപട്ടണത്ത് നടന്ന രണ്ടാം ടെസ്റ്റില്‍ ഇംഗ്ലണ്ടിനെതിരായ മത്സത്തില്‍ 91 റണ്‍സ് വിട്ടുനല്‍കിയാണ് ബുംറ 9 വിക്കറ്റുകള്‍ സ്വന്തമാക്കിയത്. ഈ പിന്‍ബലത്തിലാണ് ഒന്നാം സ്ഥാനത്തെത്തിയത്.

ഏറ്റവും പുതിയ ഐസിസി റാങ്കിങ്ങില്‍ ബുംറക്കൊപ്പം കുതിച്ചുചാട്ടം നടത്തിയ മറ്റൊരു താരം യശസ്വി ജയ്‌സ്വാള്‍ ആണ്. വിശാഖപട്ടണത്ത് ഇംഗ്ലണ്ടിനെതിരെ നടന്ന ഇന്നിങ്‌സില്‍ നേടിയ ഇരട്ട സെഞ്ചുറിയാണ് ജയ്‌സ്വാളിനെ നേട്ടത്തിന് അര്‍ഹനാക്കിയത്.