ഷാരൂഖാന്റെ ജവാൻ വമ്പൻ കളക്ഷൻ

ഷാരൂഖാന്റെ ‘ജവാൻ’ ബോക്സ് ഓഫീസിൽ 150 കോടി രൂപയിലധികം കളക്ഷൻ നേടി. രാജ്യത്ത് മാത്രം 75 കോടി രൂപയാണ് നേടിയത്. ബോളിവുഡിലെ എക്കാലത്തെയും മികച്ച തുടക്കമാണ് ജവാൻ കുറിച്ചത് .

തമിഴ് സംവിധായകൻ ആറ്റ്ലിയുമായി ചേർന്ന് ഷാരൂഖാന്റെ ആദ്യ സിനിമയാണിത്. ഖാന്റെ ഉടമസ്ഥതയിലുള്ള റെഡ് ചില്ലീസ് എന്റർടൈൻമെന്റ് ആണ് ചിത്രം നിർമ്മിച്ചത്. നയൻതാരയും ഷാരൂഖാനും ആദ്യമായി ഒന്നിക്കുന്നു എന്ന പ്രത്യേകതയും സിനിമയ്ക്കുണ്ട്. വിജയ് സേതുപതിയാണ് വില്ലൻ. ചിത്രത്തിലെ സംഗീതം അനിരുദ്ധ് രവിചന്ദർ ആണ്.

കേരളത്തിൽ ആദ്യ ദിനം 3.5 കോടി രൂപ നേടി ജവാൻ റെക്കോർഡ് സൃഷ്ടിച്ചു. കേരളത്തിൽ ഒരു ഹിന്ദി ചിത്രത്തിന് റിലീസ് ദിവസം കിട്ടുന്ന ഏറ്റവും വലിയ കളക്ഷനാണിത്. ഷാരൂഖാന്റെ തന്നെ സിനിമയായ പഠാന്റെ റെക്കോർഡാണ് ജവാൻ ഒരു ദിവസം കൊണ്ട് തിരുത്തിയത്. 1.9 കോടിയാണ് പഠാൻ അന്ന് കേരളത്തിൽ നിന്ന് നേടിയിരുന്നത്.

റിലീസായ ദിവസം തന്നെ ജവാന്റെ വ്യാജപതിപ്പ് സോഷ്യൽ മീഡിയയിൽ ചോർന്നത് അണിയറയിലും ആരാധകർക്കിടയിലും ഏറെ ആശങ്ക ഉണ്ടാക്കിയിരുന്നു. എന്നാൽ അതെല്ലാം മറികടന്നുകൊണ്ടാണ് ജവാൻ ഇപ്പോൾ വിജയക്കുതിപ്പ് തുടരുന്നത്. 5000ത്തിലേറെ സ്ക്രീനുകളിൽ ചിത്രം റിലീസ് ചെയ്തിരുന്നു.