അയോധ്യാചടങ്ങില്‍ പങ്കെടുത്തശേഷം ‘അടിയന്തരാവസ്ഥ’ പ്രഖ്യാപിച്ച് കങ്കണ; സഞ്ജയ് ഗാന്ധിയെ അവതരിപ്പിക്കാന്‍ മലയാളി നടന്‍ വിശാഖ് നായര്‍
ബോളിവുഡ് താരം കങ്കണ റണൗട്ട് തിരക്കഥ എഴുതി സംവിധാനം ചെയ്യുന്ന ചിത്രം ‘എമര്‍ജന്‍സി’യുടെ റിലീസ് തീയതി പ്രഖ്യാപിച്ചു. ജൂണ്‍ 14ന് ചിത്രം തീയറ്ററുകളില്‍ എത്തും. ചിത്രത്തിന്‍റെ പേരും പോസ്റ്ററും സൂചിപ്പിക്കുന്നതുപോലെ അടിയന്തരാവസ്ഥാകാലമാണ് പ്രമേയം. കങ്കണ തന്നെയാണ് മുന്‍ പ്രധാനമന്ത്രി ഇന്ദിരാഗാന്ധിയെ അവതരിപ്പിക്കുന്നത്. മലയാളത്തിലെ ആനന്ദം സിനിമയിലെ ‘കുപ്പി’ എന്ന കഥാപാത്രത്തിലൂടെ ശ്രദ്ധ നേടിയ വിശാഖ് നായര്‍ ആണ് എമര്‍ജന്‍സിയില്‍ സഞ്ജയ് ഗാന്ധിയായി വേഷമിടുന്നത്.
അതേസമയം അയോധ്യ രാമക്ഷേത്ര പ്രതിഷ്ഠാ ചടങ്ങിൽ പങ്കെടുത്ത് തൊട്ടടുത്ത ദിവസമാണ് കങ്കണ എമര്‍ജന്‍സിയുടെ റിലീസ് പ്രഖ്യാപിക്കുന്നത്. രാമക്ഷേത്രത്തിന് മുന്‍പില്‍വെച്ച് “ജയ് ശ്രീരാം”, “റാം ആ ഗയേ” എന്ന് ആവേശഭരിതയായി കങ്കണ ആര്‍പ്പുവിളിക്കുന്ന വീഡിയോ സോഷ്യല്‍ മീഡിയയില്‍ വൈറലായിരുന്നു. നടി തന്നെ പോസ്റ്റ്‌ ചെയ്ത വീഡിയോ 16 മില്ല്യണ്‍ ആള്‍ക്കാരാണ് കണ്ടത്.
കഴിഞ്ഞ നവംബറില്‍ റിലീസ് ചെയ്യാനിരുന്ന എമര്‍ജന്‍സി, പല കാരണങ്ങളാല്‍ മാറ്റിവയ്ക്കുകയായിരുന്നു. സീ സ്റ്റുഡിയോസും കങ്കണയുടെ മണികർണിക ഫിലിംസും ചേര്‍ന്നാണ് നിര്‍മ്മാണം. കങ്കണയ്ക്കൊപ്പം റിതേഷ് ഷായും തന്‍വി കേസരി പശുമാര്‍ഥിയും ചേര്‍ന്നാണ് തിരക്കഥ ഒരുക്കിയിരിക്കുന്നത്.
കേരളം ചർച്ച ചെയ്യാനിരിക്കുന്ന വലിയ വാർത്തകൾ ആദ്യം അറിയാൻ മാധ്യമ സിൻഡിക്കറ്റ് വാട്സ്ആപ്പ് ഗ്രൂപ്പിൽ ജോയിൻ ചെയ്യാം
Click here
