ഡിഎന്‍എ പരിശോധന ഫലം പോസിറ്റീവ്; കണ്ടെടുത്തത് അര്ജുന്റെ മൃതദേഹം തന്നെ
കര്‍ണാടക ഷിരൂരില്‍ ഗംഗാവലിയില്‍ നിന്നും കണ്ടെടുത്തത് അര്ജുന്റെ മൃതദേഹമെന്ന് സ്ഥിരീകരണം. ഡിഎന്‍എ പരിശോധനയിലാണ് ഇക്കാര്യം സ്ഥിരീകരിച്ചത്. മണ്ണിടിച്ചിലില്‍ കാണാതായ അര്ജുന്റെ മൃതദേഹം വ്യാഴാഴ്ചയാണ് പുഴയില്‍ നിന്നും പുറത്തെടുത്തത്. മൃതദേഹം ഉടൻ ബന്ധുക്കൾക്ക് വിട്ടുനൽകും. അര്ജുന്റെ സഹോദരന്‍റെ ഡിഎന്‍എ സാമ്പിളുമായാണ് ഒത്തുനോക്കിയത്. മൃതദേഹം തിരിച്ചറിയാന്‍ ആകാത്തതിനാലാണ് ഡിഎന്‍എ പരിശോധന നടത്തിയത്.
മൃതദേഹം കോഴിക്കോട്ട് എത്തിക്കുന്നത് കേരള സര്‍ക്കാരാണ്. കർണാടക പോലീസിന്‍റെ അകമ്പടിയോടെയാണ് കോഴിക്കോട്ട് എത്തിക്കുക. മൂന്നാംഘട്ട തിരച്ചിലിലാണ് അര്ജുന്റെ മൃതദേഹവും ലോറിയും വീണ്ടെടുക്കാന്‍ കഴിഞ്ഞത്. ഗോവയില്‍ നിന്നും ഡ്രഡ്ജര്‍ എത്തിച്ച് പുഴയില്‍ മണ്ണുനീക്കി നടത്തിയ പരിശോധനയിലാണ് ലോറിയും മൃതദേഹം കണ്ടെത്താന്‍ കഴിഞ്ഞത്.
കാണാതായി 72–ാം നാള്‍ ആണ് മൃതദേഹം പുറത്തെടുത്തത്. കഴിഞ്ഞ ജൂലൈ പതിനാറാം തീയതിയാണ് ഷിരൂരില്‍ മണ്ണിടിച്ചിലുണ്ടായത്. ചായക്കടയില്‍ ഉള്ളവരും സമീപം പാര്‍ക്ക് ചെയ്ത വാഹനങ്ങളുമാണ് മണ്ണിനടിയില്‍ അകപ്പെട്ടത്. മണ്ണിടിച്ചിലിൽ കാണാതായ മറ്റു രണ്ടു പേർക്കായി തിരച്ചിൽ തുടരുകയാണ്.
കേരളം ചർച്ച ചെയ്യാനിരിക്കുന്ന വലിയ വാർത്തകൾ ആദ്യം അറിയാൻ മാധ്യമ സിൻഡിക്കറ്റ് വാട്സ്ആപ്പ് ഗ്രൂപ്പിൽ ജോയിൻ ചെയ്യാം
Click here
