തൊട്ടിലില്‍ കുരുങ്ങി അഞ്ച് വയസുകാരിക്ക് ദാരുണാന്ത്യം; ദുരന്തമുണ്ടായത് വീട്ടില്‍ ആളില്ലാത്ത സമയത്ത്; കഴുത്തിൽ സ്പ്രിങ് കുരുങ്ങിയതിൻ്റെ അടയാളം

പത്തനംതിട്ട: തൊട്ടിലില്‍ കഴുത്ത് കുരുങ്ങി അഞ്ച് വയസുകാരിക്ക് ദാരുണാന്ത്യം. കോന്നിയിലാണ് നടുക്കുന്ന സംഭവം. ചെങ്ങറ സ്വദേശികളായ ഹരിദാസ് – നീതു ദമ്പതികളുടെ മകൾ ഹൃദ്യ ആണ് മരിച്ചത്. ഇളയ കുട്ടിക്ക് വേണ്ടി വീട്ടിൽ കെട്ടിയിരുന്ന തൊട്ടിലിൽ കുട്ടി കയറിയപ്പോഴാണ് അപകടം. വീട്ടിൽ ആരും ഇല്ലാത്ത സമയത്താണ് അപകടം നടന്നത്.

അച്ഛനും അമ്മയും ഇളയകുട്ടിയുമായി ആശുപത്രിയില്‍ പോയതായിരുന്നു. ഈ സമയം മുത്തച്ഛനും മുത്തശ്ശിയും വീട്ടിലുണ്ടായിരുന്നു. ഇവര്‍ പുറത്തേക്ക് പോയപ്പോള്‍ ഹൃദ്യ ഒറ്റയ്ക്കായി. ഈ സമയത്താണ് കുട്ടി തൊട്ടിലില്‍ കയറിയത്. സ്പ്രിംഗ് കുട്ടിയുടെ കഴുത്തില്‍ കുരുങ്ങിയ പാടുണ്ട്.

മുത്തശ്ശി വന്നു നോക്കുമ്പോള്‍ കഴുത്ത് തൊട്ടിലില്‍ കുരുങ്ങിയ നിലയിലായിരുന്നു. കോന്നി താലൂക്ക് ആശുപത്രിയില്‍ എത്തിച്ചെങ്കിലും അതിനിടയില്‍ തന്നെ കുട്ടി മരിച്ചിരുന്നു.