മീരാ ജാസ്മിന്‍ തെലുങ്കിലേക്ക് തിരിച്ചെത്തുന്നു; ‘സ്വാഗ്’ ക്യാരക്ടര്‍ പോസ്റ്റര്‍ റിലീസ് ചെയ്തു; തിരിച്ചുവരവിൽ സന്തോഷമെന്ന് താരം
ഒരു പതിറ്റാണ്ട് മുമ്പ് തെലുങ്ക് സിനിമയിലെ ജനപ്രിയ നായികമാരില്‍ ഒരാളായിരുന്നു മലയാളികളുടെ പ്രിയതാരം മീരാ ജാസ്മിന്‍. ബാലു പോലുള്ള ഹിറ്റ് ചിത്രങ്ങളില്‍ പവന്‍ കല്യാണിനൊപ്പം അഭിനയിച്ച മീര, നീണ്ട ഇടവേളയ്ക്ക് ശേഷം തെലുങ്ക് സിനിമയിലേക്ക് തിരിച്ചെത്തുകയാണ്. ശ്രീ വിഷ്ണു നായകനാകുന്ന സ്വാഗ് എന്ന സിനിമയിലൂടെയാണ് തെലുങ്കിലേക്കുള്ള മീരയുടെ മടക്കം.
ഹഷിത് ഗോളി സംവിധാനം ചെയ്യുന്ന സ്വാഗില്‍ വളരെ പ്രധാനപ്പെട്ട വേഷത്തിലാണ് മീര ജാസ്മിന്‍ എത്തുക എന്നാണ് റിപ്പോര്‍ട്ട്. ‘സ്വാഗിന്റെ ലോകത്തേക്ക് നടന്നെത്തുന്നതിലും തെലുങ്ക് സിനിമയില്‍ തിരിച്ചെത്തുന്നതിലും സന്തോഷം’ എന്നു മീര സോഷ്യല്‍ മീഡിയയില്‍ കുറിച്ചു. ഉത്പല ദേവി എന്ന കഥാപാത്രത്തെയാണ് മീര ചിത്രത്തില്‍ അവതരിപ്പിക്കുന്നത്. പീപ്പിള്‍ മീഡിയ ഫാക്ടറി നിര്‍മിക്കുന്ന ചിത്രത്തിലെ പ്രധാന നായിക റിതു വര്‍മയാണ്. സ്വാഗ് ഒരു കോമഡി എന്റര്‍ടെയിനര്‍ ആകും എന്നാണ് റിപ്പോര്‍ട്ട്.
വിവാഹത്തിന് ശേഷം സിനിമയില്‍ നിന്നും നീണ്ട ഇടവളയെടുത്ത മീര ജാസ്മിന്‍, സത്യന്‍ അന്തിക്കാട് സംവിധാനം ചെയ്ത മകള്‍ എന്ന ചിത്രത്തിലൂടെയാണ് തിരിച്ചുവരവ് നടത്തിയത്. നരേന്‍ നായകനായ ക്വീന്‍ എലിസബത്ത് ആണ് മീരയുടേതായി ഏറ്റവും ഒടുവില്‍ പുറത്തിറങ്ങിയ സിനിമ.
കേരളം ചർച്ച ചെയ്യാനിരിക്കുന്ന വലിയ വാർത്തകൾ ആദ്യം അറിയാൻ മാധ്യമ സിൻഡിക്കറ്റ് വാട്സ്ആപ്പ് ഗ്രൂപ്പിൽ ജോയിൻ ചെയ്യാം
Click here
