മിസോറാം വിദ്യാർത്ഥി തിരുവനന്തപുരത്ത് കുത്തേറ്റ് മരിച്ചു; സഹപാഠി അറസ്റ്റിലായി

തിരുവനന്തപുരം നഗരൂർ രാജധാനി എഞ്ചിനീയറിംഗ് കോളേജിലെ വിദ്യാർത്ഥികൾ തമ്മിലുണ്ടായ തർക്കത്തിലാണ് ഒരാൾക്ക് കുത്തേറ്റത്. രാത്രി പതിനൊന്ന് മണിയോടെയായിരുന്നു സംഭവം. നഗരൂരിനടുത്ത് നെടുംപറമ്പ് ജംഗ്ഷന് സമീപത്ത് വച്ചാണ് വിദ്യാർത്ഥികൾ തമ്മിൽ ഏറ്റുമുട്ടിയത്. മിസോറാം സ്വദേശി വാലന്‍റൈന്‍ വി.എൽ. എന്ന യുവാവാണ് കൊല്ലപ്പെട്ടത്.

മൂന്നാം വർഷ വിദ്യാർത്ഥിയാണ് വാലന്‍റൈന്‍. സംഭവത്തില്‍ മിസോറാം സ്വദേശി ലംസംഗ് സ്വാല അറസ്റ്റിലായി. ഇരുവരും സഹപാഠികളാണ്. മദ്യപാനത്തിനിടെ ഉണ്ടായ തർക്കമാണ് അക്രമത്തിൽ കലാശിച്ചത്. നെഞ്ചിലും വയറിലും കുത്തേറ്റാണ് മരണം ഉണ്ടായതെന്ന് പോലീസ് പറഞ്ഞു. സംഭവത്തിൽ കൂടുതൽ ഉൾപ്പെട്ടിട്ടുണ്ടോ എന്നും പരിശോധിക്കുന്നുണ്ട്.

സംഭവത്തിൻ്റെ സിസിടിവി ദൃശ്യങ്ങൾ ലഭിച്ചിട്ടുണ്ട്. ഇത് പോലീസ് വിശദമായി പരിശോധിക്കുന്നുണ്ട്. പരുക്കേറ്റ വാലൻ്റൈനെ ആദ്യം ആറ്റിങ്ങലിലെ സ്വകാര്യ ആശുപത്രിയിലും പിന്നീട് മെഡിക്കൽ കോളജിലും എത്തിച്ചെങ്കിലും പരുക്ക് ഗുരുതരം ആയിരുന്നതിനാൽ രക്ഷിക്കാനായില്ല.