ചന്ദ്രനിൽ ലാൻഡർ ഇറങ്ങിയ സ്ഥലം ഇനി ‘ചന്ദ്രമാതാ ശിവശക്തി പോയന്റ്’; പേരിട്ട് പ്രധാനമന്ത്രി

‘ചന്ദ്രമാതാ ശിവശക്തി പോയന്റ്’ ഇനി ഈ പേരിലാകും ചന്ദ്രനിൽ ലാൻഡർ ഇറങ്ങിയ സ്ഥലം അറിയപ്പെടുക. പ്രധാനമന്ത്രി നരേന്ദ്ര മോദിയാണ് പേര് നിർദേശിച്ചത്. ചന്ദ്രയാൻ-3 ദൗത്യത്തിൽ പങ്കാളികളായ ശാസ്ത്രജ്ഞരെ ബംഗളൂരുവിലെ ഐ.എസ്.ആർ.ഒ ആസ്ഥാനത്തെത്തി നേരിട്ട് അഭിനന്ദിച്ച പ്രധാനമന്ത്രി ശിവശക്തി പോയന്റ്‌ ഇന്ത്യയുടെ ശാസ്ത്രനേട്ടങ്ങളുടെ അടയാളമാണ്‌ എന്ന് പറഞ്ഞു.

2019 ൽ ചന്ദ്രയാൻ -2 തകർന്ന ചന്ദ്രനിലെ പോയിന്റിന് ‘തിരംഗ പോയിന്റ്’ എന്നും പ്രധാനമന്ത്രി പേരിട്ടു. ചാന്ദ്രയാൻ-3 ചന്ദ്രനിൽ സോഫ്റ്റ് ലാൻഡിങ് നടത്തിയപ്പോൾ മോദി ബ്രിക്സ് ഉച്ചകോടിയുടെ ഭാഗമായി ദക്ഷിണാ​ഫ്രിക്കയിലായിരുന്നു. ഇന്ത്യയിൽ തിരിച്ചെത്തിയാൽ ഉടൻ ബംഗളൂരുവിൽ പോയി ചന്ദ്രയാൻ-3 വിജയത്തിന് പിന്നിൽ പ്രവർത്തിച്ച ശാസ്ത്രജ്ഞർക്ക് ആദരം അർപ്പിക്കാൻ ഞാൻ തീരുമാനിച്ചതായും മോദി വ്യക്തമാക്കി. ഐ.എസ്.ആർ.ഒ മേധാവി എസ്. സോമനാഥും മറ്റ് ശാസ്ത്രജ്ഞരും ചേർന്നാണ് പ്രധാനമന്ത്രിയെ സ്വീകരിച്ചത്.