മോദിക്ക് നന്ദിയെന്ന് പവാര്‍; മോദി പ്രസംഗിച്ചിടത്ത് എല്ലാം ജയം മഹാവികാസ് അഘാഡിക്ക്; വിട്ടുപോയവരെ തിരികെ കൂട്ടില്ലെന്ന് ഉദ്ധവ് താക്കറെ

മഹാരാഷ്ട്രയില്‍ മോദി തിരഞ്ഞെടുപ്പ് റാലികളും റോഡ്ഷോയും നടത്തിയിടത്തെല്ലാം മഹാവികാസ് അഘാഡി സഖ്യത്തിന് വിജയിക്കാനായെന്ന് എൻസിപി (എസ്.പി.) നേതാവ് ശരദ് പവാർ. മഹാവികാസ് അഘാഡി നേതാക്കളായ ശരദ് പവാർ, ഉദ്ധവ് താക്കറെ, പൃഥ്വിരാജ് ചവാൻ എന്നിവരുമൊപ്പം സംയുക്ത വാർത്താസമ്മേളനത്തിൽ സംസാരിക്കുകയായിരുന്നു അദ്ദേഹം. പൊതുതിരഞ്ഞെടുപ്പിൽ ബിജെപിക്ക് ഏറ്റവും വലിയ തിരിച്ചടി നേരിട്ട സംസ്ഥാനങ്ങളിലൊന്നാണ് മഹാരാഷ്ട്ര. കഴിഞ്ഞ ലോക്സഭാ തിരഞ്ഞെടുപ്പില്‍ 23 സീറ്റു ലഭിച്ച ബിജെപിക്ക് ഇക്കുറി ഒൻപത് സീറ്റുകള്‍ മാത്രമാണ് ലഭിച്ചത്.

മോദിയോട് നന്ദി പറയേണ്ടത് തന്റെ കടമയാണ്. മഹാവികാസ് അഘാഡിയ്ക്ക് അനുകൂലമായി രാഷ്ട്രീയ അന്തരീക്ഷം സൃഷ്ടിച്ചതിന് മോദിയോട് നന്ദി പറയുന്നുവെന്നും പരിഹസിച്ചു കൊണ്ട് പവാര്‍ പറഞ്ഞു.

എന്‍ഡിഎ സഖ്യം വിട്ട് മടങ്ങിവരാൻ ആ​ഗ്രഹിക്കുന്നവരെ ഒരിക്കലും തിരിച്ചെടുക്കില്ലെന്ന് ശിവസേനാ ഉദ്ധവ് വിഭാ​ഗം നേതാവ് ഉദ്ധവ് താക്കറെ പറഞ്ഞു. “മഹാരാഷ്ട്ര നിയമസഭാ തിരഞ്ഞെടുപ്പിലും ഇതേ സഖ്യം മത്സരിക്കും. ലോക്സഭാ തിര‍ഞ്ഞെടുപ്പിലെ വിജയം തുടക്കം മാത്രമാണ്. നിയമസഭാ തിരഞ്ഞെടുപ്പിൽ സഖ്യം വിജയം ആവർത്തിക്കും.” – ഉദ്ധവ് പറഞ്ഞു.