ശനിയാഴ്ചകളിൽ മാത്രം അക്രമാസക്തൻ; നാനിയുടെ ‘സൂര്യാസ് സാറ്റര്‍ഡേ’; വിവേക് ആത്രേയ ചിത്രം തിയറ്ററുകളിലേക്ക്

തെലുങ്ക് നടന്‍ നാനി മലയാളികള്‍ക്കും പ്രിയപ്പെട്ട താരമാണ്. അദ്ദേഹത്തിന്റെ ഏറ്റവും ഒടുവില്‍ പുറത്തിറങ്ങിയ ‘ഹായ് നാന’ ഉള്‍പ്പെടെയുള്ള ചിത്രങ്ങള്‍ മലയാളി പ്രേക്ഷകരും ഏറ്റെടുത്തതാണ്. നാനിയെ നായകനാക്കി വിവേക് ആത്രേയ സംവിധാനം ചെയ്യുന്ന സൂര്യാസ് സാറ്റര്‍ഡേ എന്ന ചിത്രം റിലീസിനൊരുങ്ങുകയാണ്. ഓഗസ്റ്റ് 29ന് ചിത്രം തിയറ്റുറുകളിലെത്തും. തെലുങ്ക്, തമിഴ്, കന്നഡ, മലയാളം, ഹിന്ദി തുടങ്ങിയ ഭാഷകളിലായാണ് റിലീസ്.

ചിത്രത്തിന്റെ സെക്കന്‍ഡ് ലുക്ക് പോസ്റ്റര്‍ കഴിഞ്ഞ ദിവസം പുറത്തിറങ്ങിയിരുന്നു. പുഞ്ചിരിച്ചുകൊണ്ട് ബൈക്ക് ഓടിക്കുന്ന നാനിയെ പോസ്റ്ററില്‍ കാണാം. ഡിവിവി എന്റര്‍ടൈന്‍മെന്റിന്റെ ബാനറില്‍ ഡിവിവി ദനയ്യയും കല്യാണ്‍ ദാസരിയും ചേര്‍ന്നാണ് ഈ ബിഗ് ബജറ്റ്ചിത്രം നിര്‍മ്മിക്കുന്നത്. ചിത്രീകരണം അവസാനഘട്ടത്തിലാണ്.

ആക്ഷന്‍ ഹീറോ ആയാണ് സൂര്യാസ് സാറ്റര്‍ഡേയില്‍ നാനി എത്തുന്നത്. എസ്. ജെ. സൂര്യയും സായ് കുമാറുമാണ് ചിത്രത്തിലെ മറ്റ് കഥാപാത്രങ്ങളെ അവതരിപ്പിക്കുന്നത്. പ്രിയങ്ക അരുള്‍ മോഹനാണ് നായിക. ശനിയാഴ്ചകളില്‍ മാത്രം അക്രമാസക്തനാകുന്ന സൂര്യ എന്ന ചെറുപ്പക്കാരനായാണ് നാനി എത്തുന്നത്.

നദിയാ മൊയ്തു, നസ്രിയ നസീം, തന്‍വി റാം എന്നിവര്‍ അണിനിരന്ന നാനി-വിവേക് ആത്രേയ ചിത്രമായിരുന്നു അന്റേ സുന്ദരാനികി. തിയറ്ററുകളില്‍ മികച്ച പ്രതികരണം നേടിയ ചിത്രത്തിനു ശേഷം നാനിയും വിവേകും വീണ്ടും ഒന്നിക്കുന്നു എന്ന പ്രത്യേകതയും സൂര്യാസ് സാറ്റര്‍ഡേ എന്ന ചിത്രത്തിനുണ്ട്.