ന​ന്ദ​ൻ​കോ​ട് കൂ​ട്ട​ക്കൊ​ലയില്‍ വിചാരണ നവംബറില്‍; കുറ്റം നിഷേധിച്ച് കാഡൽ ജിൻസൺ രാജ

തി​രു​വ​ന​ന്ത​പു​രം ന​ന്ദ​ൻ​കോ​ട് കൂ​ട്ട​ക്കൊ​ലയില്‍ വിചാരണ നവംബര്‍ 13ന് ആരംഭിക്കും. മാതാപിതാക്കളെയും സഹോദരിയെയും ക്രൂരമായി വധിച്ച കേസിലെ പ്രതി കാഡൽ ജിൻസൺ രാജയെ കോടതി കു​റ്റ​പ​ത്രം വാ​യി​ച്ചു​കേ​ൾ​പ്പി​ച്ചു. എന്നാല്‍ പ്രതി കുറ്റം നിഷേധിച്ചു. മാനസിക രോഗത്തിന് ചികിത്സയിലായിരുന്ന പ്രതിക്ക് വിചാരണ നേരിടാന്‍ കഴിവുണ്ടെന്ന റിപ്പോര്‍ട്ട് കോടതിയില്‍ സമര്‍പ്പിച്ചിരുന്നു. ഇതോടെയാണ് വിചാരണ തുടങ്ങാന്‍ കോടതി തീരുമാനിച്ചത്.

കൊലപാതകം, തെളിവ് നശിപ്പിക്കല്‍,മാരകായുധങ്ങള്‍ ഉപയോഗിച്ച് പരിക്കേല്‍പ്പിക്കുക, വീട് നശിപ്പിക്കല്‍ എന്നീ കുറ്റങ്ങളാണ് പ്രതിക്കെതിരെ ചുമത്തിയത്. തി​രു​വ​ന​ന്ത​പു​രം ആ​റാം അ​ഡീ​ഷ​ണ​ൽ സെ​ഷ​ൻ​സ് കോ​ട​തി​യാ​ണ് കേ​സ് പ​രി​ഗ​ണി​ക്കു​ന്ന​ത്.

2017 ഏപ്രിൽ എട്ടിനാണ് നാടിനെ നടുക്കി കാഡൽ ജിൻസൺ രാജ മാതാപിതാക്കളെയും സഹോദരിയെയും ബന്ധുവിനെയും വീട്ടില്‍ വച്ച് അതിദാരുണമായി കൊലപ്പെടുത്തിയത്. നന്ദൻകോട് ക്ലിഫ് ഹൗസിന് സമീപം ബെയിൽസ് കോമ്പൗണ്ടില്‍ താമസിച്ചിരുന്ന റിട്ട. പ്രൊഫ. രാജ തങ്കം, ഡോ. ജീൻ പദ്മ, മകൾ കരോലിൻ, ഡോക്ടറുടെ ബന്ധു ലളിത എന്നിവരാണ് കൊല്ലപ്പെട്ടത്.

ഡോക്ടറുടെയും ഭർത്താവിന്റെയും മകളുടെയും മൃതദേഹങ്ങൾ കത്തിക്കരിഞ്ഞ നിലയിൽ വീടിന്റെ മുകളിലത്തെ നിലയിലെ ടോയ്‌ലെറ്റിലുമാണ് കണ്ടെത്തിയത്. ആത്മാവിനെ സ്വതന്ത്രമാക്കാനുള്ള ആസ്ട്രൽ പ്രൊജക്ഷന് അടിമയാണ് താന്‍. ഈ രീതിയിലാണ് കൂട്ടക്കൊല നടത്തിയത് എന്ന് കാഡൽ പൊലീസിനോട് സമ്മതിച്ചിരുന്നു. കൊലപാതകത്തിന് ശേഷം തമിഴ്നാട്ടിലേക്ക് രക്ഷപ്പെട്ട കാഡൽ തിരിച്ചുവന്നപ്പോള്‍ തിരുവനന്തപുരം റെയില്‍വേ സ്റ്റേഷനില്‍ വെച്ചാണ് അറസ്റ്റിലായത്.