മുഖ്യമന്ത്രി എത്തുമ്പോള്‍ കടകള്‍ തുറക്കരുത്; ഏറ്റുമാനൂര്‍ പോലീസിന്റെ നിര്‍ദ്ദേശം അമ്പരപ്പിക്കുന്നു
കോട്ടയം: മുഖ്യമന്ത്രിയും മന്ത്രിമാരും പങ്കെടുക്കുന്ന നവകേരള സദസ്സ് നാളെ ഏറ്റുമാനൂരില്‍ നടക്കുന്നതിനാല്‍ കടകള്‍ അടയ്ക്കണമെന്ന് പോലീസ് നിര്‍ദ്ദേശം. ഏറ്റുമാനൂര്‍ പോലീസാണ് വ്യാപാരി വ്യവസായി ഏകോപന സമിതി നേതാക്കള്‍ക്ക് രേഖാമൂലം നിര്‍ദ്ദേശം നല്‍കിയത്.
രാവിലെ ആറ് മണിമുതല്‍ പരിപാടി അവസാനിക്കും വരെ കോവില്‍പാടം റോഡിലെയും പാലാ റോഡിലെയും വ്യാപാര സ്ഥാപനങ്ങള്‍ തുറക്കാന്‍ പാടില്ലെന്നും അല്ലാത്തപക്ഷം ഉണ്ടാകുന്ന ക്രമസമാധാന പ്രശ്‌നങ്ങള്‍ക്ക് കടയുടമകള്‍ ഉത്തരവാദിയായിരിക്കുമെന്നാണ് അറിയിപ്പ്.
ഡിസംബര്‍ ഏഴിന് ആലുവയില്‍ നവകേരള സദസ് നടക്കുമ്പോഴും സമാന നിര്‍ദ്ദേശം പോലീസ് നല്‍കിയിരുന്നു. ആലുവ പ്രൈവറ്റ് ബസ്സ് സ്റ്റാൻഡിലെ കടകളിൽ ഗ്യാസ് സിലണ്ടർ ഉപയോഗിക്കുന്നതിനും പാചകത്തിനുമാണ് വിലക്കേര്‍പ്പെടുത്തിയത്. ഈ നിര്‍ദ്ദേശവും വിവാദമായിരുന്നു. ആലുവ ഈസ്റ്റ്‌ പോലീസാണ് നവകേരള സദസിൻ്റെ സുരക്ഷയുടെ ഭാഗമായി പാചകം നിരോധിച്ച് നിർദ്ദേശം നൽകിയത്.
കേരളം ചർച്ച ചെയ്യാനിരിക്കുന്ന വലിയ വാർത്തകൾ ആദ്യം അറിയാൻ മാധ്യമ സിൻഡിക്കറ്റ് വാട്സ്ആപ്പ് ഗ്രൂപ്പിൽ ജോയിൻ ചെയ്യാം
Click here
