തിരക്കുമൂലമുള്ള അപകടം; അയ്യപ്പഭക്തര്‍ ഇക്കാര്യങ്ങൾ ശ്രദ്ധിക്കുക

പത്തനംതിട്ട: ശബരിമലയിൽ തീ​ർ​ഥാടകരുടെ തിരക്ക് വർധിക്കുന്നു. ഈ മണ്ഡലകാലത്ത് നടതുറന്നതിന് ശേഷമുണ്ടായ ഏറ്റവും വലിയ തിരക്കാണ് വെള്ളി, ശനി ദിവസങ്ങളിൽ അനുഭവപ്പെട്ടത്. നിലവിൽ ഒരു മിനുട്ടിൽ 60-65 ഭക്തരെ വീതം പതിനെട്ടാം പടി കയറാൻ അനുവദിച്ചാണ് നിലവില്‍ പോലീസ് തിരക്ക് നിയന്ത്രിക്കുന്നത്. 75000-ന് മുകളിൽ തീർത്ഥാടകരാണ് ശനിയാഴ്ച സന്നിധാനത്തെത്തിയത്. കഴിഞ്ഞ രണ്ട് ദിവസങ്ങളിൽ പതിനായിരങ്ങളാണ് സ്പോട്ട് ബുക്കിംഗ് വഴി ദർശനം നടത്തിയത്.

വെർച്ച്വൽ ക്യൂ വഴി തീ​ർ​ഥാടനത്തിന് ബുക്ക് ചെയ്യുന്നവർ അവരവർക്ക് അനുവദിക്കുന്ന സമയത്ത് എത്തിയാൽ ഒന്നര മണിക്കൂറിനകം ദർശനം പൂർത്തിയാക്കാനാകുമെന്ന് പോലീസ് അറിയിച്ചു. 55,803 തീ​ർ​ഥാ​ട​ക​രാ​ണ് ഇന്ന് വെർച്വൽ ക്യൂ ​വ​ഴി ദ​ർ​ശ​ന​ത്തി​ന്​ ബു​ക്ക് ചെ​യ്തിരിക്കുന്നത്. നാളെ 63,177 പേ​രും ബു​ക്ക് ചെ​യ്തി​ട്ടു​ണ്ട്.

പരമ്പരാഗത കാ​ന​ന​പാ​ത​ക​ളാ​യ ക​രി​മ​ല, പു​ല്ലു​മേ​ട് വ​ഴി​യും വലിയ ഭക്തജന തിരക്കാണ് കഴിഞ്ഞ ദിവസങ്ങളിൽ ഉണ്ടായത്. ശ​നി​യാ​ഴ്ച വൈ​കീ​ട്ട് അപ്രതീക്ഷിതമായി പെയ്തക​ന​ത്ത മ​ഴ തീ​ർ​ഥാ​ട​ക​ർ​ക്ക് ചെറിയ രീതിയിൽ ബു​ദ്ധി​മു​ട്ടുകൾ സൃഷ്ടിച്ചിരുന്നു.

സുരക്ഷിതമായ തീ​ർ​ഥാടനത്തിന് പാലിക്കേണ്ട നിർദേശങ്ങൾ

തിരക്കുമൂലമുള്ള അപകടം

• അനാവശ്യ തിരക്ക് ഉണ്ടാക്കാതിരിക്കുക.
• ദർശനത്തിനുള്ള ക്യുവി കൂടെ സാവധാനത്തിൽ നീങ്ങുക.
• ശാരീരിക ബുദ്ധിമുട്ടുകൾ അനുഭവപ്പെട്ടാൽ മെഡിക്കൽ സംഘത്തിന്റെ സഹായം തേടുക.
• ആഴിയുടെ സമീപം സുരക്ഷിതമായ അകലം പാലിക്കാൻ ശ്രദ്ധിക്കുക.
• മകരവിളക്ക് ദർശനത്തിനായി എത്തുന്നവര്‍ തിരഞ്ഞെടുക്കുന്ന സ്ഥലം സുരക്ഷിതമാണെന്ന് ഉറപ്പ് വരുത്തുക.
• ഉയർന്ന മരച്ചില്ലകളും അപകടകരമായ പ്രദേശങ്ങളും ഒഴിവാക്കുക

ജലാശയ അപകടം

• പമ്പയിൽ കുളിക്കാനിറങ്ങുന്ന തീ​ർ​ഥാടകർ സുരക്ഷാ ഉദ്യോഗസ്ഥരുടെ നിർദേശങ്ങൾ കർശനമായി പാലിക്കണം.
• കുട്ടികളെ പ്രത്യേകം ശ്രദ്ധിക്കണം.
• അപകട സാധ്യമേഖല എന്ന അടയാളപെടുത്തിയ സ്ഥലങ്ങളിൽ ഇറങ്ങാതെയിരിക്കുക.
• ദർശനത്തിന് എത്തുമ്പോഴും തിരികെ പോകുമ്പോഴും പരിചിതമല്ലാത്ത ജലാശയങ്ങളിൽ ഇറങ്ങി കുളിക്കാതിരിക്കുക.
• അപകടം ശ്രദ്ധയിൽ പെട്ടാൽ 101 നമ്പറിലോ അടുത്തുള്ള ഫയർ പോയിന്റിന്റെ വിവരമറിയിക്കുക.

തീ പിടുത്ത അപകടം

• തീ​ർ​ഥാടകർ ഒരു കാരണവശാലും സംരക്ഷണ വന മേഖലയിലേക്ക് പ്രവേശിക്കരുത്.
• കാടിനുള്ളിൽ വച്ച് ഭക്ഷണം പാകം ചെയ്യരുത്.
• തീ​ർ​ഥാടകർ പടക്കങ്ങൾ കയ്യിൽകരുത്തുവാനോ പൊട്ടിക്കുവാനോ പാടില്ല.
• എൽപിജി സിലിണ്ടർ ഉപയോഗിക്കുന്ന സ്ഥാപനങ്ങൾ ആവശ്യത്തിനുള്ള സിലിണ്ടർ മാത്രം സ്ഥാപനത്തിൽ സൂക്ഷിക്കുക.
• കരുതൽ സിലണ്ടറുകൾ ഗോഡൗണിൽ സൂക്ഷിക്കുക.
• എൽപിജി സിലിണ്ടറുകൾ ചൂട് തട്ടാതെയും പെട്രോൾ ഡീസൽ മണ്ണെണ്ണ എന്നിവയിൽ നിന്നും അകലത്തിലും സൂക്ഷിക്കുക.
• കച്ചവട സ്ഥാപനങ്ങൾ പ്രാഥമിക അഗ്നി ശമന ഉപകരണങ്ങൾ നിർബന്ധമായും സൂക്ഷിക്കുക.
• വനത്തിനു സമീപം ഉള്ള കച്ചവടക്കാർ കടയ്ക്ക് ചുറ്റും ഫയർലൈൻ സ്ഥാപിച്ചിട്ടുണ്ട് എന്ന് ഉറപ്പ് വരുത്തുക.

എമർജൻസി നമ്പറുകൾ

• സന്നിധാനം കണ്ട്രോൾ റൂം :04735 202033
• പമ്പ കണ്ട്രോൾ റൂം :04735 203333
• അഗ്നി രക്ഷാനിലയം സീതത്തോട് :04735 258101
• അഗ്നി രക്ഷാനിലയം പത്തനംതിട്ട :04682 222001
• അഗ്നി രക്ഷാനിലയം റാന്നി :04735 224101