പാതിരാ റെയ്ഡിന് പിന്നില്‍ മന്ത്രി രാജേഷിന്റെ ബുദ്ധി എന്ന് സുധാകരന്‍; പാലക്കാട് ചെയ്തതിന് എല്‍ഡിഎഫ് അനുഭവിക്കും
പാലക്കാട് പോലീസ് നടത്തിയ റെയ്ഡിന്റെ തിരിച്ചടി സിപിഎമ്മും കോണ്‍ഗ്രസും അനുഭവിക്കുമെന്ന് കെപിസിസി അധ്യക്ഷന്‍ കെ.സുധാകരന്‍. രാഹുല്‍ മാങ്കൂട്ടത്തില്‍ പാലക്കാട് വലിയ ഭൂരിപക്ഷത്തില്‍ ജയിക്കുമെന്നും സുധാകരന്‍ പറഞ്ഞു.
“മന്ത്രി എം.ബി.രാജേഷ് പോലീസിനു നല്‍കിയ കര്‍ക്കശമായ നിര്‍ദേശമാണ് റെയ്ഡിന് പിന്നില്‍. ‘ഞാന്‍ മന്ത്രിയാണ്. ഞാന്‍ പറയുന്നത് ചെയ്‌താല്‍ മതി.’ എന്ന് പറഞ്ഞാണ് പോലീസിനെ വിരട്ടിയത്. ഈ പണം ഹോട്ടലില്‍ നിന്നും എങ്ങോട്ട് പോകും. വനിതാ നേതാക്കളെ വിറപ്പിച്ച പോലീസുകാര്‍ അവസാനം തലതാഴ്ത്തി എഴുതിക്കൊടുത്ത് പോയില്ലേ.”
“ഇടതുപക്ഷത്തിന്റെ നേതാവിന്റെ ഹോട്ടലിലാണ് പോലീസ് റെയ്ഡ് നടത്തിയത്. ധീരതയോടെയാണ് കോണ്‍ഗ്രസ് വനിതാ നേതാക്കള്‍ ആ സാഹചര്യം കൈകാര്യം ചെയ്തത്. കള്ളപ്പണം ഉണ്ടാക്കാന്‍ ശ്രമിച്ചവരല്ല കോണ്‍ഗ്രസുകാര്‍. അനധികൃത സമ്പാദ്യം കോണ്‍ഗ്രസുകാര്‍ ഉണ്ടാക്കാറില്ല.”
“ട്രോളി ബാഗ് വിവാദത്തില്‍ കാര്യമില്ല. രാഹുലിന്റെ വസ്ത്രങ്ങള്‍ ആണ് ബാഗില്‍ ഉണ്ടായിരുന്നത്. രാഹുലിന് ശുക്രദശ ആണ് എന്നാണ് ഞാന്‍ രാഹുലിനെ വിളിച്ച് പറഞ്ഞത്.” സുധാകരന്‍ പറഞ്ഞു.
കേരളം ചർച്ച ചെയ്യാനിരിക്കുന്ന വലിയ വാർത്തകൾ ആദ്യം അറിയാൻ മാധ്യമ സിൻഡിക്കറ്റ് വാട്സ്ആപ്പ് ഗ്രൂപ്പിൽ ജോയിൻ ചെയ്യാം
Click here
